Една од најинтересните приказни во историјата на спортот го доби својот краен епилог. По прекрасното финале на Мундијалот, Аргентина е светски првак!
После 120 минути борба, резултатот беше 3:3, а потоа „гаучосите“ победија во пенал серијата, со резултат 4:2, во меч за кој ќе се зборува со генерации.
Првите 45 минути беа демонстрација на силата на „гаучосите“, а за тоа колку тоа полувреме беше тортура за сите во земјата на „галските петли“ говори и фактот што Франција не упати ниту еден удар кон голот на ривалот.
Се очекуваше дека, како и многу финалиња, и вчерашната увертира ќе протече во почетно испитување на силите, но тоа не беше случај.
Селекторот на јужноамериканците, Скалони, постави ултра офанзивна тактика, а од првиот судиски свиреж го нападна голот кој го чуваше Уго Лорис.
Само дефанзивниот блок на Дешан во тие моменти ги спаси Французите, кои едноставно немаа ниту доволно енергија, ниту страст, неопходни за натпревари од ваков тип.
Летаргични, безволни, како да беа на тренинг во тие моменти триколорите.
Тоа што се наѕираше во првиот дел од првото полувреме всушност и се случи, Аргентина поведе.
Во 21. минута Дембеле невнимателно стартуваше и го собори Ди Марија во казнетиот простор, а главниот судија од Полска, Симон Маричињак покажа на белата точка.
Меси мирно ја испрати топката на едната страна, Лорис отиде на другата, гаучосите поведоа во големото финале!
Аргентинскиот „магионичар“ стана така првиот играч во историјата на Светските првенства кој постигнал гол на секој натпревар од групната фаза, а потоа и на секој меч од нокаут фазата.
Веќе во 36. минута Ди Марија по фантастична тимска акција погоди за 2:0!
Фудбалска рапсодија на „гаучосите“, тотална доминација, Французите во нокдаун, едноставно не знаеја што ги погоди!
Дешан целосно ги загуби нервите, а се чинеше, барем во тој момент, и конците на играта, и направи нешто што не се гледа во финалињата на Мундијалите.
Селекторот целосно изиритиран од изданието на своите играчи го испрати Оливие Жиру на клупата, после Мбапе најдобар на овој шампионат.
На клупата за резерви се пресели уште една ѕвезда на „триколорите“, Усман Дембеле.Во игра влезе Маркус Тирам, синот на легендарниот Лилијен Тирам, а покрај него влезе и Коло Муани, за многу љубители на фудбалот тотален анонимус.
Станува збор за играч на Франкфурт, кој дотогаш само два пати играше на првенството, и тоа против Тунис, во меч кој немаше никакво резултатско значење, а потоа како „џокер“ влезе во полуфиналето против Мароко.
Со резултат 2:0 за „гаучосите“ се замина на одмор.
До 68. минута, верувале или не, избраниците на Дешан не упатија ниту еден удар кон голот.
По Жиру и Дембеле, теренот го напушти и Гризман.
Дешан се чини се предаде, во најважниот меч годинава селекторот на „галските петли“ ги извади сите ѕвезди освен Мбапе. На теренот влезе последниот играч за врска на Реал, Камавинга.
Офанзивни играчи си заминуваа, дефанзивци влегуваа, се чинеше дека легендарен играч, а сега и трофеен тренер, ќе биде „распнат“ во француските медиуми.
И тогаш, во моментот кога се чинеше дека се чека само последниот судиски свиреж, „хорор“ финалето за Французите се претвори во драма за целиот свет.Стоперот на Аргентина, Николас Отаменди стартуваше невнимателно, главниот судија повторно покажува на белата точка, само овој пат во корист на „триколорите“.Погодува Мбапе, за неочекувана надеж.
И само две минути подоцна, БУМ!
Повторно тој чудесен суперталент маестрално ја зафаќа топката и делириум на величествениот „Лусаил“, а мечот оди во продолженија.
Светот го доби тоа што го сакаше, драма, спектакл, борба до последниот атом на силата и капка пот.
После 90 минути борба гради во гради, без гард, конечно и едните и другите застанаа на топката, веројатно исцрпени од убиственото темпо што го имаше низ целиот натпревар, а потоа, второто продолжение и бомбардирање на голот чуван од Лорис.
Шансите постојано се нижеа, за да во 109. минута повторно настане делириум на трибините кои беа исполнети со страсни Аргентинци.
Една гужва во казнетиот простор, и кој друг, ако не Лео Меси.
Повторно заличи дека тоа е крај, но љубителите на најважната споредна работа на светот добија продолжение на трилерот.
Марчињак повторно покажува на пенал, повторно за Франција, и Мбапе повторно погодува, а мечот оди во пенал серијата, која ја добива Аргентина и станува светски шампион.
АРГЕНТИНА – ФРАНЦИЈА 3:3
Стадион: „Лусаил“
Гледачи: 88.966
Судија: Симон Марчињак (Полска)
СОСТАВИ:
Аргентина: Мартинез – Молина, Ромеро, Отаменди, Таљафико – Ди Марија, Де Пол, Фернандез, Мекалистер – Меси, Алварез.
Селектор: Лионел Скалони.
Франција: Лорис – Кунде, Варан, Упамекано, Ернандез – Гризман, Чуамени, Рабио – Дембеле, Жиру, Мбапе.
Селектор: Дидије Дешан.
