„Отворивме важен реформски процес. Владата заедно со комесарот Хан прецизираше документ за реформите кои треба да се спроведат“, изјави премиерот Зоран Заев по завршувањето на разговорите со комесарот Хан и делегациите.
Европските перспективи, според Заев, не се повеќе далечност. Доколку спроведувањето на реформите тече според планот, Европската Унија треба да даде позитивна оценка.
„Дефиниравме краткорочни, среднорочни и долгорочни цели со кои имаме намера на есен Европската комисија да ја отстрани условената препорака за почеток на предпристапните преговори, а во текот на следната година земјите членки на Унијата да ги фокусираме на дискусија за утврдување датум за почеток на предпристапни преговори на ЕУ со Македонија. Остварувањето на реформските приоритети за ЕУ ќе значи и отворање на вратите на НАТО“, рече Заев.
Тој појасни дека станува збор за документ чие име е „Патоказ“, кој до 1. јули треба да се заокружи и да се објави во јавност.
„Во ’Патоказ’ се вклучени владеење на правото, слободни медиуми, Рамковниот договор, извештајот на Прибе и забелешките на Еропската комисија и сите други меѓународни организации, истакна Заев.
Тој очекува брзо реализирање на реформите и веќе следната година земјите членки на ЕУ да се фокусираат на дискусија за влез на Македонија во Европската Унија и ја повика опозицијата активно да се вклучи во спроведување на реформите.
„Доколку дејстуваме заедно, успехот ќе биде заеднички и загарантиран“, рече Заев.
Во однос на спорот со името македонскиот премиер посочи дека е уверен во градењето на пријателска атмосфера и доверба со што ќе се создадат минимум услови да се разговара отворено за прашањето.
