Венеција од следната година ќе воведе туристичка такса за влез во градот од најмалку три евра за гости кои се во нејзина еднодневна посета.
Таксата, најавена пред речиси една година и која требаше да биде воведена од 1 јули 2020 година, ќе се применува на еднодневни излетници кои стигнуваат со автобус, брод, водено такси, авион или со воз, но не и на оние кои престојуваат во хотели, пренесува порталот „травелмаркетпорт.ком“.
Венецијанските власти објавија дека нивото на таксата ќе биде прецизно утврдено пред датумот на стапување на сила на уредбата, во која, како што се забележува во текстот, предложениот износ е меѓу три и 10 евра дневно, што значи дека во шпицот на сезоната износот ќе биде поголем.
Исто така, се додава дека оваа давачка ќе биде наплатувана и на островите Мурано и Бурано.
Од таксата ќе бидат иземени патниците кои во Венеција доаѓаат заради работа, на студии или од семејни причини.
За начинот на плаќање сеуште се разговара и тој моментно се разработува.
Тие кој ќе се обидат да се прошверцуваат во градот ќе се соочат со глоба од 100 до 450 евра.
Оваа даночна иницијатива е најнов обид на градот во борбата против негативните ефекти од масовниот туризам, кој во последните неколку години ги мачи популарните европски дестинации.
Венеција во текот на 2017 година примила повеќе од 36 милиони странски туристи, што претставува раст од речиси 10 отсто во однос на претходната година. Градот има близу 55 илјади жители.
Парите собрани од туристичката такса ќе се користат како допринос за одржување на градот, со што делумно ќе се неутрализираат високите давачки кои локалното население ги плаќа за комунални услуги, како што е на пример за фрлањето и однесувањето на сметот.