Италијанскиот парламент го разгледува предлог законот со кој се приморуваат претпријатијата на жените кои се изложени на болни менструации да им дадат три дена платен одмор секој месец.
Ако законот биде усвоен, Италија ќе биде првата земја со службен „менструален одмор“ за вработените жени.
Предлог законот го пофалија одделни медиуми, нарекувајќи го позитивен чекор за помагање на жените кои страдаат од болни ментруации.
Меѓутоа, законот има и критичари, дири и меѓу вработените жени кои би ги штител.
Некои стравуваат дека законот може да им се скрши од глава на припадничките на понежниот пол и да биде своеврсна казна во земјата во која жените наголемо се борат за рамноправност.
„Ако на жените им биде дозволено да земат три дена платен одмор, работодавачите би можеле на мажите да им дадат уште поголема предност при вработување“, сметаат критичарите.
Италија има закон кој на жените им обезбедува пет месеци платено породилно отсуство. Во текот на тој период примаат 80 отсто од платата, а после тоа двата родители имаат право на шест дополнителни месеци „родителско отсуство“, во текот на кое добиваат 30 отсто од платата.
Меѓутоа, Италијанките се борат за свое место на пазарот на трудот повеќе отколку жените во другите земји во развој. Италија има една од најниските стапки на учество на жената на пазарот на труд. Само 61 отсто од жените работат, што е значително под европскиот просек кој изнесува 72 отсто.
Тоа е главно последица на неподготвеност на работодавачите да вработат жена и да ја задржат откако ќе стане мајка. Според податоците на државниот завод за статистика, речиси една четвртина од жените добиваат отказ во текот на бременоста или непосредно по породувањето, иако е тоа противзаконско.
„Жените веќе земаат слободни денови поради менструални болки, но новиот закон тоа би им го овозможил без користење на боледување или други дозволи. Постои стравување дека законот би можел да доведе до негативни последици, побарувачката за жени во компаниите би можела да се намали или жените би можеле да се соочат со помала плата или со лошо напредување“, смета Даниела Пјазалунга, економист во Институтот за истражување ФБК.
Од друга страна, феминистките се загрижени дека донесувањето на законот може да ги зајакне стереотипите за тоа дека жените се поемоционални во текот на тој период.
Жените од Демократската партија го дадоа овој предлог закон, а неговото одобрување се очекува во наредните месеци.
Слични закони веќе постојат во одделни делови во Кина, Јапонија и Јужна Кореја.
Некои приватни фирми, меѓу кои и „Најк“, одамна имаат воведени вакви одмори за работничките.
