Италијанската влада воведе еднократен данок од 40 отсто на добивката на банките, а собраните пари планира да ги искористи за да им помогне на луѓето кои земаат хипотекарни заеми за да го купат својот прв имот.
Наглиот раст на каматните стапки на централните банки им донесе рекорден профит на банките, со оглед дека тој раст можеа да го пренесат на корисниците на кредитите, а во исто време не ги зголемија значително каматите на депозитите.
Земјите како Шпанија и Унгарија веќе воведоа данок на прекумерната добивка на банкарскиот сектор.
Италијанската влада годинава ќе ја оданочува со еднократен данок од 40 отсто нето каматната маржа на банките, која претставува разликата меѓу каматите на заемите и депозитите и е извор на заработка на банките.
Се проценува дека со овој данок ќе се соберат нешто помалку од три милијарди евра, дознава Ројтерс од добро упатени извори.
Десничарската влада на Италија во повеќе наврати ги критикуваше банките дека повисоката цена на парите не ја пренесоа и на штедачите, но се покрена дури после последната низа на рекордни заработувачки за кои банките известија кон крајот на јули и почетокот на август.
Сите италијански банки остварија многу подобри резултати од очекувањата и ги зголемија проценките за добивката благодарение на растот на каматните стапки.
Водечката италијанска банка „Интеса Санпаоло“ на крајот на минатиот месец објави дека оваа година очекува добивка од над 13,5 милијарди евра од нето каматната маржа.
„Уникредит“, исто така, ги подобри финансиските насоки за оваа година и сега очекува дека годинава ќе оствари нето приход поголем од 21,5 милијарди евра и нето добивка над 7,25 милијарди евра.
„Треба само да ги погледнете профитите на банките во првата половина од годината за да разберете дека не зборуваме за неколку милиони, туку за милијарди“, рече потпретседателот на владата, Матео Салвини, на прес-конференција во Рим вчера доцна попладнето.
„Ако е вистина дека товарот на повисоките камати двојно се зголемен за домаќинствата и фирмите, она што го добиваат сопствениците на тековните сметки сигурно двојно не се зголемило“, наведе Салвини, додавајќи дека постои голем јаз меѓу применетите стапки на кредитите и депозитите.
