Премиерот Димитар Ковачевски во интервјуто за „Би-Би-Си“ истакна дека Македонија за стартот на преговорите со Европската Унија постигна клучни цели, и за јазикот и за идентитетот.
„Ако сакате да бидете лидер, мора да носите тешки одлуки. Во овие преговори ние имавме неколку цели и ги постигнавме. Прво: чист македонски јазик во ЕУ. Второ: чист македонски идентитет. И почеток на преговорите со ЕУ, што и се случи на 19 јули. Дополнително, направивме историските прашања да бидат надвор од преговарачката рамка“, истакна Ковачевски.
Патем, тој спомена дека историската комисија работи со четиринаесет членови, седум од македонска и седум од бугарска страна, и оти тие носат одлуки само со консензус и тие одлуки може да бидат спроведени на реципроцитетна основа меѓу двете земји. И, дека и тоа е всушност договорот, каде тие, историчарите, ќе се занимаваат со историски прашања.
„Го потпишавме првиот договор со ЕУ, во кој има чист македонски јазик, без фусноти, без објаснувања и уште поважно, во врска со договорот со Фронтекс, Грција и Бугарија, одобрија договор во кој има чист македонски јазик“, рече Ковачевски.
Во однос на ЕУ интеграциите тој напомена дека овој процес беше заглавен уште пред да почне, пред единаесет години, од претходната Влада, зашто тие, смета тој, не биле подготвени да ги поместат, за ниту еден милиметар.
„Тие не донесоа никакви одлуки. Сега ние имаме два концепти во државава. Едниот концепт, кој јас го водам, е дека Македонците и сите други граѓани на Северна Македонија, со кренати глави, со достоинство, треба да седнат на големата маса во Брисел и да го кажат својот став за сите прашања, да преговараат и да станат членови на ЕУ. Другиот концепт е со лажно достоинство, сами, изолирани, во конфликт со соседите, без разговори со ЕУ. Ова ‘седење на мала маса’ го гледавме со години“, изјави премиерот.
Тој е дециден дека сите политички партии имаат одговорност да носат одлуки кои ќе донесат подобра иднина за идните генерации.
„Процесот за членство во Унијата ќе биде тежок, преговорите ќе бидат мачни, свесен сум за тоа, сите граѓани се свесни за тоа, но наградата е таа, членство во ЕУ, бидејќи македонските граѓани сакаат да бидат дел од ЕУ, сакаат да живеат во ЕУ, но во нивната држава тука, а не да ја напуштат нивната земја и да работат во земјите членки на ЕУ“, подвлече Ковачевски и додаде дека најлесно е да се биде политичар кој зборува за минатото, бидејќи кога зборувате за минатото, не ветувате ништо, само играте со емоциите на луѓето, а тешко е да се биде политичар кој зборува за иднината, зашто тогаш давате ветување.
