Од ноќеска на полноќ бензинот еуросупер БС-95 и екстра лесното масло за домаќинствата ќе се продаваат по нови цени. Според одлуката на Регулаторната комисија за енергетика и водни услуги, „суперот 95“ ќе се продава по цена повисока за половина денар од претходната, додека пак за толку ќе поевтини екстра лесното масло за домаќинствата.
Новата цена на БС-95 е 85 денари, а масло за домаќинствата е 72,5 денари за литар.
Поскапува и мазутот М-1 НС за 0,330 денари и новата цена ќе изнесува 41,409 денари за килограм.
Цените на бензинот БС-98 и на дизелот остануваат исти и тие и натаму ќе се продаваат за 87 денари, односно 74 денари за литар.
Со одлуката на „Регулаторна“ се врши зголемување на малопродажните цени на нафтените деривати во просек за 0,14 отсто во однос на одлуката од 10 април.
Според регулаторите, референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 0,784 отсто, а кај дизелот за 0,639 отсто.
Екстра лесното масло има намалување за 0,211 отсто, додека кај мазутот се бележи зголемување за 1,245 отсто.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,164 проценти.
(Фото: „Нова Македонија“)
