Портпаролот на Кремљ, Дмитриј Песков, ги негираше обвинувањата против Русија во врска со неодамнешните сајбер-напади на веб-страниците на украинските државни органи, велејќи дека Киев ја обвинува Москва дури и заради „лошото време“.
„Немаме никаква врска со тоа. Русија нема никаква врска со овие сајбер-напади“, изјави Песков во интервју за американската телевизија „Си-Ен-Ен“.
Песков нагласи дека Москва е запознаена со наводите дека зад сајбер нападот, наводно, стои Русија, но дека ова е „уште едно неосновано обвинување“ против Русија.
„Речиси сме навикнати Украинците да ја обвинуваат Русија за се, дури и за лошото време во нивната земја“, додаде портпаролот на рускиот претседател.
Портпаролот на украинското Министерство за надворешни работи, Олег Николенко, во петокот соопшти дека веб-страниците на неколку министерства МНР и на низа други државни органи привремено не работат поради хакерски напад. На почетната страница на Министерството за образование и наука беше објавено дека, наводно, сите лични податоци на Украинците биле објавени на општата мрежа. Државната служба за специјални комуникации и заштита на информации на Украина соопшти дека не дошло до протекување на лични податоци поради хакерскиот напад. Како што наведуваат од агенцијата, државните сајтови биле изложени на најсилниот напад во последните четири години.