Директорката на Управата за јавни приходи, Сања Лукаревска, вчера најави воведување на прогресивно оданочување, но дека тоа, како што истакна, не треба да биде избрзано решение.
„Анализата за структурата на данокот на личен доход покажа дека најголем раст имаме кај страната на платите и на приходите што ги имаат граѓаните од игрите на среќа. Дали ефектот од прогресивното оданочување тогаш би бил позитивен, сметам дека не. Затоа во иднина треба да направиме соодветна дистинкција и да го одбереме најдоброто, но да не биде избрзано“, рече Лукаревска во „Топ Тема“ на Телма и додаде дека тоа е причината што веднаш не се воведува прогресивното оданочување.
Порача дека во иднина ќе следат многу дебати на таа тема со цел да бидат сослушани сите страни.
„Праведност, ефектност и транспарентност во наплатата е суштината на еден праведен даночен систем. Можеби се згреши во делот на прогресијата што не се отвори соодветна долготрајна дебата за да се види кое е најсоодветното решение. Сепак, праведноста е заштитен знак на прогресивното оданочување“, посочи Лукаревска.
Нагласи дека од крајот на август стартувал само предлогот за даночна реформа и додаде дека неколку пати напоменале дека можеби ништо од тоа нема да влезе во имплементација.
„Ги слушнавме сите релевантни фактори и нивните сугестии. Сметам дека во време на криза е право време да се направат даночни реформи. Даночни реформи ќе има, но треба да се направат многу јавни дебати. Ги слушаме и ќе ги слушаме пораките од сите, бидејќи не треба да се носат проблематични решенија“, рече Лукаревска.
Таа вели дека Управата за јавни приходи не е носач на решенија, туку е само имплементатор и дека во услови на криза не може да се предвидуваат економските текови, бидејќи се се менува од ден на ден.
