Во пресрет на првата сесија на заедничкиот состанок на Северноатлантскиот совет, посветена на операциите и мисиите на Алијансата, министерката за одбрана Радмила Шекеринска вчера попладне имаше билатерални средби со своите колеги од Грција и од Естонија, Никос Панагиотопулос и Јури Луик.
На средбата со новиот грчки министер за одбрана Шекеринска истака дека двете држави треба да градат блиски билатерални односи и дека соработката на полето на одбраната ќе придонесе за тоа.
Шекеринска и Панагиотопулос го поздравија спроведувањето на мисијата „Air policing“ од страна на грчкото воздухопловство, за што началниците на Генералштабовите на армиите минатиот месец потпишаа и Технички аранжман.
„Преспанскиот договор ги отвори вратите за членство во НАТО, а реформите го обезбедија. И Северна Македонија и Грција имаат исти интереси – безбеден, стабилен и економски сигурен регион“, истакна министерката која се заблагодари за грчката поддршка за отворање на пристапни преговори на неодамнешниот Самит на ЕУ.
Грчкиот министер, Панагиотопулос, пак, порача дека двете земји со меѓусебна почит и со добра волја, имаат шанса да изградат подобра иднина за своите граѓани.
Договорот за соработка во одбраната, истакна тој, отвара многу можности за соработка и припадниците на двете армии ќе можат подобро да се запознаат, да вежбаат и да се усовршуваат заедно, како сојузници. Панагиотопулос, патем, се согласи дека за Балканот да биде мирен и стабилен потребно е да има искрени и добри односи помеѓу соседите.
На средбата со естонскиот министер за одбрана, Јури Луик, министерката се заблагодари за брзата ратификација на пристапниот протокол од страна на официјален Талин, и истакна дека овој процес продолжи да се движи со исклучителна брзина со оглед дека парламенти на 26 земји членки веќе го завршија ратификацискиот процес.
„Естонија со нетрпение го чека денот кога Северна Македонија ќе биде полноправен член на НАТО“, порача министерот Луик.
Министерката Шекеринска на заедничкиот состанок на министрите за одбрана на земјите – членки на НАТО, посочи дека Северна Македонија е целосно посветена на вредностите на Алијансата, како и на учеството во мисии и операции предводени од НАТО. На состанокот, таа се заблагодари за доследноста на Алијансата и за брзата ратификација на Протоколот за членство во НАТО, кој помина во парламентите на 26 земји членки.
Состаноците на министрите за одбрана во Брисел на кои учествува министерката Шекеринска, продолжуваат денеска.
(Фото: МИА)
