Претставници на компании од Пелагонија бараат можност извозно ориентирани фирми да инвестираат во слободната економска зона.
На средбата со претприемачите и менаџерите на малите и средните компании од прилепскиот регион, организирана од Бизнис-конфедерацијата на Македонија, биле разгледувани и актуелните проблеми и предизвици со кои се соочуваат компаниите.
Целта на средбата е унапредување на бизнис-климата и создавање подобри услови за работа на локалните компании.
„Одржуваме постојани контакти со нашите членови, спроведуваме истражувања, анализи и мерење на состојбите во разни сфери на општественото дејствување на локално, национално и регионално ниво, со што сме релевантен катализатор на изразувањето на деловната заедница и поттикнувач на социјалниот дијалог и индустриските односи во земјата. Овие директни средби само одат во прилог на тоа, го зголемуваат нашиот делокруг и ги интензивираат нашето дејствување и конкретните чекори во реформските зафати, законските измени и економските стратегии, за обезбедување продуктивна бизнис-клима“, вели Миле Бошков, претседател на Бизнис-конфедерацијата на Македонија.
За надминување на проблемите со кои се соочуваат компаниите, Бизнис-конфедерацијата на Македонија изработи платформа од предлог-политики и стратегии базирани на најпроблематичните точки во работата на деловните субјекти.
Бизнис-конфедерацијата на Македонија организира средби и промотивни настани во повеќе градови и региони од државата, во кои се вклучени голем број сопственици, претприемачи и менаџери.
