Кандидатот за американски државен секретар, а до неодамна директор на ЦИА, Мајк Помпео, тајно ја посетил Северна Кореја во текот на Великденските празници и се сретнал со севернокорејскиот лидер Ким Јонг Ун. На средбата Помпео и Јонг Ун разговарале за планираниот самит на Ким и американскиот претседател Доналд Трамп, изјавил неименуван американски претставник.
Со оваа посета, Помпео стана првиот од највисоките американски официјални лица којшто се сретна со Ким и со тоа даде силен знак дека Трамп сака да разговара со семернокорејскиот лидер, пренесува Ројтерс.
Средбата меѓу Помпео и Јонг Ун ја организирале шефовите на јужнокорејската и севернокорејската разузнувачка служба, Су Хун и Ким Јонг Чол, а со цел да се види дали Ким има сериозни намери да преговара.
Според наводите на неименуваниот извор, Помпео, еден од најдоверливите советници на Трамп, после средбата рекол дека ниту една локација не била избрана од понудената листа, како и тоа дека до сега не се направени никакви логистички ангажмани.
Трамп: Пет локации за состанок со Ким
Американскиот претседател Доналд Трамп изјави дека се надева дека ќе се состане со севернокореанскиот лидер Ким Јонг Ун и дека за место за самитот се разгледуваат пет локации, но и дека е можно тој да не се одржи.
Трамп напоменал дека Јужна Кореја има негов благослов да се обиде да го запре војувањето со Пјонгјанг, пренесува Ројтерс.
„Луѓето не разбираат дека Корејската војна не е завршена. Токму сега се одвива. И тие разговараат за крај на тој судир. Имаат мој благослов за запирање на воените дејствија“, истакнал Трамп.
Американскиот претседател, патем, додал дека САД почнале директни разговори со Северна Кореја на „екстремно високо ниво“ да за се обидат да договорат негова средба со Ким Јонг Ун.
„И навистина верувам дека тоа ни го овозможува добрата волја за да се случат добри работи. Ќе видиме што ќе се случи затоа што на крајот се гледа резултатот, а не фактот дека размислуваме за состанокот или да имаме состанок“, рекол Трамп.
Тој, исто така, напоменал дека е возможно дипломатските напори да се организира состанокот да пропаднат.
Американскиот претседател го прими јапонскиот премиер Шинзо Абе во својот клуб Мар-а-Лаго на Флорида, со кого освен за Северна Кореја, разговарал за трговски, воени и безбедносни прашања.
Јапонскиот премиер на средбата, меѓу другото, посочил дека е воодушевен од „храброста“ наТрамп да се сретне со севернокорејскиот лидер.
