Возило „Ауди“ со битолски регистарски ознаки управувано од Р.Г.(40) од Битола вчера во 20:35 часот излетало од коловозот на стариот пат Ѓавато – Тополчани во близина на туланата во правец кон крстосницата за село Могила при што возачот починал на лице место.
Увид извршиле јавен обвинител и екипа од Секторот за внатрешни работи Битола. По наредба на јавен обвинител, телото на починатиот е дадено на обдукција.
Патничкиот воз бр.660, управуван од машиновозачот Ј. Н. кој сообраќа на релација Скопје-Кичево вчера во 18:10 часот наишол и удрил во поставени камења на делот од пругата меѓу железничките станици Жеровјане и Гостивар, при што од ударот е предизвикано оштетување на моторот и карданот, поради што возот застанал веднаш по ударот.
Повредени патници нема. Железничкиот сообраќај на тој дел од пругата бил во прекин. Во 23 часот сообраќајот е нормализиран.
При пасошка контрола на граничниот премин „Деве Баир“ на излез од Македонија, вчера во 8 часот кај А.К.(27) од Албанија констатирано е дека страниците бр. 9 и 10 се од обична хартија, со лист налепен во патната исправа на прецизен и професионален начин.
Поради сомнение дека се работи за кривично дело „фалсификување исправа“ тој е лишен од слобода.
Полициски службеник од полициско одделение Петровец, вчера околу 23:10 часот, бил нападнат при интервенција за физички напад. М.С.(43) од Скопје, кој бил под дејство на алкохол физички ги нападнал неговиот брат и снаа, а при обид на полицискиот службеник да интервенира М.С. го нападнал удирајќи го со глава во пределот на носот.
М.С. е лишен од слобода во полициска станица Гази Баба, а полицискиот службеник побарал лекарска помош во Ургентен Центар Скопје. Против сторителот ќе биде поднесена пријава за напад на полициски службеник.
