Словенија овие денови ја потресува грозоморен случај на болничка грешка.На почетокот на октомври на двајца пациенти им била извршена гастроскопија.На здрав пациент во доцните 40-ти му било кажано дека е тешко болен, заради што на крајот на ноември му бил отстранет желудникот.Извесно време потоа на „тешко болниот пациент“ му кажале дека е здрав.
Урша Мурн, директорка на Медицинскиот центар „Барсос“ во Љубљана, вели:
„Подоцна се покажа дека најверојатно дошло до замена.
Не знаеме точно во кој дел од процесот“, пишува интернет порталот Данас.хр.
Дека нешто не е во ред, откриле во јануари, откако изваденото ткиво било испратено на анализа, каде што не биле пронајдени канцерогени клетки. Тогаш здравиот пациент дознал дека по грешка останал без желудник.
Адвокатот на оперираниот пациент, Рок Петрич, вели:
„Со ваков шок каков што доживеа мојот клиент, прашањето за психолошка помош само се наметнува. Господинот е во тежок шок од се.“
Другиот пациент, кој во октомври добил наод дека е здрав, во меѓувреме направил дополнителен преглед кој покажал дека има карцином. Дури четири месеци бил убедуван дека е здрав и не се лекувал.
Директорката Урша Мурн објасни:
„Кај нас на пациентот му беше извршена контролна гастроскопија, каде што беше направена биопсија и врз основа на истата е утврдено дека има канцерогени клетки, заради што веднаш беше испратен на понатамошно лекување.“
Дијагностичарот, велат, случајно ги заменил примероците од ткивата од двајцата пациенти.
Гашпер Пилко, раководител на Одделот за оперативни активности во љубљанскиот Онколошки институт, пак, вели:
„Од Медицинскиот центар ‘Барсос’ на крајот на јануари не известија дека најверојатно дошло до замена на примероци на двајца пациенти.
Му се извинивме на пациентот, му понудивме психолошка помош и поддршка во лекувањето, главно во вид на престој на Клиника за исхрана.“
За овој пропуст предоцна дознаа не само пациентите, туку и во ресорното министерство.
Маријан Пинтар, државен секретар на словенечкото Министерство за здравство, изјави:
„Тука роковите секако се пробиени. Пропишаниот рок е 48 часа.“
Од Институтот велат дека не се обиделе да ги прикријат случаите, туку дека вакво нешто првпат им се случува, па не знаеле за протоколот.
Директорката Урша Мурн додава:
„Факт е дека пациентот ни беше приоритет, дека пациентите се информирани, дека се грижиме за пациентите.“
Адвокатот на пациентот кој остана без здрав желудник, освен обештетувањето за кое ќе се обиде да се спогоди со болницата, очекува и конкретни објаснувања како дошло до овој голем пропуст.
„Се надевам дека секоја од институциите кои се дел од скандалов ќе соработува со мене и со мојот клиент во процесот на утврдување на фактите за тоа каде е направена грешката и што ја предизвикало. Со своето невнимание словенечките лекари загрозиле два животи. Здравјето не можат да им го вратат, но затоа пациентите би можеле да добијат отштета меѓу 100 и 200 илјади евра.“
(Фото: Илустрација)
