Бобмашот-самоубиец, неговите соработници и странскиот налогодавец ја користеле месинџер апликацијата „Телеграм“ за подготовка на терористичкиот напад во Санкт Петербург, соопшти руската Федерална служба за безбедност (ФСБ).
„Во текот на операцијата за спроведување на истрага за терористичкиот напад од 3 април годинава во метрото во Санкт Петербург, ФСБ добила доверлива информација дека извршителот и помагачите користеле ’Телеграм’ за прикривање на своите криминални намери во сите фази на организацијата и подготовката на нападот“, се наведува во соопштението.
Терористите активно го користат „Телеграм“, затоа што тој овозможува да направите тајни разговори со висок ниво на шифрување на информациите кои се пренесуваат, се наведува во соопштението на руската ФСБ.
Со анализи на снимките од камерите, руската полиција го утврди идентитетот на човекот кој го активираше експлозивот. Терористот самоубиец е Акбаржон Џалилов (22), роден во градот Ош, во Киргизија, по националност Узбек. Џалилов имал и руско државјанство, а руска патна исправа добил во 2011 година. За него гарантирал татко му кој живеел и работел во Русија.
Џалилов во Санкт Петербург живеел последните шест години. Се знае дека во 2015 година бил вработен во еден суши бар.
Сега полицијата трага по истомислениците на Акбаржон од терористичката организација Исламска држава. Според проценките на разузнувачките служби, во редовите на Исламска држава ина повеќе од две илјади луѓе од Киргизија. Тие се два пати повеќе од екстремистите од Дагестан кои заминале да војуваат во Сирија.
Руската полиција, наведува весникот „Комерсант“, имала информација за тоа дека исламистите подготвувале терористичка акција. Тоа им го соопштил уапсен терорист којшто војувал во Сирија, а кој не ги знаел сите детали затоа што не припаѓал на врвот на терористичката организација.
При експлозијата што се случи на потегот меѓу станиците „Сенски плоштад“ и „Технолошки институт 2“ загинаа 16 лица, вклучувајќи го и бомбашот-самоубиец.
Торба со експлозив беше поставена и на станицата „Плоштад на востанието“, но таа не експлодираше, беше откриена на време.
Последната голема терористичка акција се случи на 29 декември 2013 година на железничката станица во Волгоград. Тогаш загинаа 16 лица. Пред тоа на 29 март 2010 година, две жени терористки активираа експлозивни направи во метро станиците „Лубјанка“ и „Парк на културата“ во Москва и тогаш загинаа 41 лице, а 88 беа ранети.
