После двенеделен раст, минатата недела цените на нафтата на светските берзи паднаа, а нивното движење главно зависеше од вестите од Блискиот Исток.
На лондонскиот пазар цената на барелот минатата недела падна за 1,8 отсто, на 90,48 долари, додека на американскиот пазар цената на барелот се намали за 3,6 отсто, на 85,54 долари.
Цела недела, цените осцилираа во релативно тесен опсег, во зависност главно од вестите од Блискиот Исток.
Кога вестите укажуваа на заострување на конфликтот меѓу Израел и палестинската милитантна група Хамас, цените на нафтата растеа, а кога се чинеше дека напнатоста се намалува, цените паѓаа.
Нивниот пад на неделно ниво ќе беше уште поголем доколку во петокот цените не пораснеа за околу три отсто, затоа што трговците ги вознемири нападот на американските воени авиони врз магацините со оружје и муниција во Сирија.
Пентагон објасни дека возвратил на нападите на паравоените сили, кои ги поддржува Иран, на американските вооружени сили, од почетокот на конфликтот меѓу Израел и Хамас.
Конфликтот меѓу Израел и Хамас и вооружените инциденти во регионот засега не влијаеја директно на испораките на нафта, но можни се прекини во испораките од Иран и другите големи производители во Персискиот Залив.
„Дури и на најинформираните набљудувачи на настаните во регионот се уште им е многу тешко со сигурност да прогнозираат како ќе се развива кризата бидејќи сè уште не е јасно каде се линиите чие преминување би можело на бојното поле да донесе и други актери“, смета Хелима Крофт од „РБЦ Капитал“.
По минатонеделниот пад, ценовните добивки годинава се намалени. На лондонскиот пазар цената на барелот сега е во плус во однос на почетокот на годината за нешто повеќе од 5 отсто, а на американскиот пазар околу 7 отсто.
