На светските берзи, минатата недела цените на нафтата паднаа за повеќе од 3,5 отсто затоа што централните банки заради високата инфлација и понатаму ги креваат каматните стапки, што ќе го забави растот на економиите и со тоа и побарувачката за „црното злато“.
Цената на барелот на лондонскиот пазар падна за 3,6 отсто, на 73,85 долари, додека пак на американскиот барелот поефтини за 3,7 отсто, и сега чини 69,16 долари.
Падот на цените следеше со вториот дел од неделата, откако во извештајот на Конгресот за економската состојба, претседателот на Централната банка на САД, Џeреми Пауел, рече дека каматните стапки веројатно ќе треба дополнително да се зголемат за да се потисне инфлацијата.
Колку? Тоа, порача Пауел, ќе зависи од идните економски показатели, а во врска со шпекулациите дека ФЕД на крајот на годината може да почне да ги намалува каматите, тој истакна дека тоа не се очекува толку скоро.
Бидејќи инфлацијата во западните економии сè уште се движи на високо ниво, и другите централни банки продолжуваат со зголемување на цената на парите.
