Бирото на Европското јавно обвинителство во моментов ја чешла интерната преписка меѓу шефицата на Европската комисија, Урсула фон дер Лајен и првиот човек на фармацевтската компанија „Фајзер“, Алберт Баурле, пренесува „Политико“.
Станува збор за случај што во Лиеж на почетокот на 2023 година го покрена 36-годишниот белгиски лобист Фредерик Балдан, поради сомневање за „злоупотреба на јавна функција, судир на интереси и корупција“.
И покрај тоа што деталите за самиот случај се прекриени со велот на тајната, затоа што истрагата е се уште во тек, добро упатени извори, чиј идентитет редакцијата на „Политико“ не го открива, биле подготвени да откријат за што се работи. Тврдат дека шефицата на Комисијата, покрај наведените кривични дела, е осомничена и за саботирање на истражниот процес поради уништување на доказен материјал, односно бришење на спорната кореспонденција.
Уште посериозна нота на целиот скандал му дава фактот што европското обвинителство го презеде случајот од белгиските власти, поради што под лупата на европските истражители може да се најде целата Комисија, и тоа непосредно пред претстојните избори за Европскиот парламент, на кои актуелната шефица сака да обезбеди уште еден мандат на чело на ЕУ.
Европската комисија досега упорно избегнуваше да дава какви било официјални информации за случајот, а на медиумите формално не им го потврди ниту самото постоење на спорната преписка меѓу Фон дер Лајен и Баурле.
Да потсетиме, договорот за снабдување на вакцините на „Фајзер“ со проценета вредност од 20 милијарди долари во 2022 година беше протолкуван како еден од најголемите триумфи на Комисијата на Урсула фон дер Лајен.Но, во меѓувреме се покажа дека нарачката била нереално голема, заради што вредноста на „пропаднатите“ дози се проценува на 4 милијарди евра.
И покрај тоа што политичките противници на шефицата на Комисијата, како и бројни невладини организации задолжени за промовирање на транспарентност, инсистираа Фон дер Лајен да се произнесе за целиот скандал, таа тоа упорно го избегнуваше.
Подносителот на жалбата што го покрена овој скандал, ја обвинува Фон дер Лајен дека условите за таквата профитабилна набавка таа ги договарала преку приватни комуникациски канали, заобиколувајќи ги притоа строгите правила за јавни набавки на Унијата, поради што се сомнева во постоење на корупција.
На овој процес брзо се приклучија унгарската и полската влада. Но, откако кормилото над владата во Полска го презеде Доналд Туск, Варшава нагло се повлече од целата приказна.
