Актуелната состојба во обвинителствата, идната редовна комуникација, потребата од размена на искуства, заедничката определба и подготвеност за соработка со цел поефикасно гонење на сторителите на кривичните дела, беа теми на кои се зборувало на првата средба меѓу државниот јавен обвинител Љубомир Јовески и специјалната јавна обвинителка во чии ингеренции се кривичните дела поврзани со незаконското следење на комуникациите Катица Јанева.
„На работниот состанок што се одржа вчера во просториите на Јавното обвинителство на Република Македонија стана збор и за актуелните реформи во правосудниот систем и неопходната активна вклученост на јавните обвинителства – се вели во соопштението на СЈО.
Јовески и Јанева ги разгледале прашањата опфатени со претстојните измени во законите со кои се регулира кривичната материја, особено во однос на поставеноста и организацијата на обвинителствата.
Притоа потенцирано е значењето на меѓусебната поддршка и почит со цел успешна реализација на суштинските реформи што ќе придонесат за подобрување на улогата на јавниот обвинител во целокупниот правосуден систем во државата.
