Американските конгресмени планираат да го забранат ТикТок на мобилните телефони на функционерите, бидејќи, велат, оти тоа ја загрозувало националната безбедност.
Многу сојузни држави веќе го сториле тоа, па социјалната мрежа е во неизвесна позиција во САД, каде што самото нејзино постоење е доведено под знак прашање.
После Сенатот минатата недела, Претставничкиот дом може уште оваа недела да усвои текст со кој се забранува преземањето и користењето на ТикТок на службените уреди на лицата што се во федералните служби.
Речиси дваесет американски држави веќе донесоа слични мерки за своите вработени.
„Тоа не е прашање за демократите или за републиканците, тоа е прашање за националната безбедност“, изјави за АФП, Рајан Мекдагл, сенатор од Вирџинија, запознаен со ова прашање.
„Главниот проблем е тоа што ТикТок е во сопственост на компанија (ByteDance) која и самата е под реална контрола на Кинеската Комунистичка партија“, изјави во неделата за Си-Ен-Ен, републиканецот, Мајк Галагер, член во Претставничкиот дом.
За ова прашање, кое долго време беше „интересно“ само за републиканците, се постигнува се поширок консензус, па претседателката на Претставничкиот дом, Ненси Пелоси, во петокот изјави дека е за тоа за текстот да се гласа уште оваа недела.
Во вториот законски нацрт испратен минатата недела од претставниците на двете партии, се бара, кратко и јасно, забрана на ТикТок во САД, она што пред крајот на неговиот мандат во 2020 година неуспешно се обиде да го направи Доналд Трамп.
ТикТок презеде неколку мерки за да ги убеди американските власти дека податоците на американските корисници на платформата се заштитени, особено со фактот дека тие се складирани на сервери во САД. Но, тие признаа дека нивните вработени во Кина имаат пристап до тие податоци, иако тие се многу ограничени.
„Кинеската комунистичка партија не побара од нас да ги споделиме овие податоци“, истакнаа од ТикТок, додавајќи дека компанијата не споделила информации за американските корисници со партијата и дека нема да го сторат тоа дури и ако им биде побарано такво нешто.
(Фото: АФП)
