Судот во Солун денеска го одложи судењето на поранешниот началник на Петтата управа во МВР, Горан Грујевски и вработениот во УБК, Никола Бошкоски, кои во четвртокот беа уапсени на солунскиот аеродром при обид со фалсификувани бугарски пасоши да заминат за Будимпешта. Двајцата се товарат за поседување лажни патни исправи.
Причина за одложувањето на судењето е што судот не можел да најде преведувач од грчки на македонски јазик.
За Грујевски и Бошкоски македонските власти имаа распишано меѓународни потерници откако двајцата се дадоа во бегство по обвинението од Специјалното јавно обвинителство за нелегално прислушување и за уништување на системите за прислушување, случаи познати под името „Тврдина“, „Таргет“ и „Тврдина 2“, и одлуката на Основниот суд во Скопје да им определи мерка притвор
Судењето е закажано за во вторник на 24 октомври.
Претходно грчки медиуми јавија дека Грујевски и Бошкоски може да бидат екстрадирани кон крајот на ноември или во првите недели на декември годинава, а дотогаш ќе бидат во притвор во Грција.
Постапката од македонска страна ја води Министерството за правда, кое синоќа од МВР го доби известувањето од Интерпол-Атина за двајцата притворени.
Скандалот со прислушувањето во Македонија беше разоткриен во 2015 година и предизвика политичка криза во земјата.
