Дополнителни субвенции или интервентен откуп, се двете опции за непречен откуп на пченицата, но која од нив ќе биде најсоодветно решение ќе се знае по анализите на терен и раговорите со засегнатите страни, соопшти денеска министерот за земјоделство, шумарство и водостопанство, Љупчо Николовски.
Според него, причината за дисбаланс на пазарот е одлуката на претходната влада која во мај годинава продала 21.000 тони пченица од државните резерви. Пченицата била купена по 14 денари за килограм, а е продадена по шест.
„Оваа непромислена одлука на претходната влада оди на директна штета на земјоделците и таа го прави дисбалансот на пазарот“, истака Николовски.
Како што информира, до крајот на овој месец ќе се знаат производната и пазарната цена.Тоа ќе биде еден од показателите за преземање соодветна мерка, а паралелно се следи и состојбата на терен. Исто така, овие денови ќе се одржи заедничка средба со производителите и откупувачите на која ќе бидат соооштени предвидените политики.
„Се прават последните анализи на ниво на потсекторски групи. Не сакаме да шпекулираме околу цената на пченицата, да даваме паушални изјави, без соодветни истражување“, подвлече министерот Николовски.
Годинава, рече, се засеани околу 74.000 хектари лебно жито или 6.000 помалку од лани. Главната причина за намалените површини се неповолните временски услови.
