Предлозите на италијанскиот министер за здравство забраната за пушење да се прошири и на отворените простори пред баровите и во парковите предизвикаа гнев кај колегите од десницата во владата, кои го прогласија за „комуњар“.
Министерот Орацио Шилачи, технократ без партиска припадност, во јануари вети дека ќе се бори против пушењето, вклучително и против електронските цигари, кои тинејџерите често ги користат.
Новите прописи ќе ги опфатат надворешните површини на баровите и станиците за јавен превоз.
Забраната ќе се прошири и на парковите во кои престојуваат бремени жени и деца.
Младиот министер за култура Виторио Сгарби, познат по своето карактеристично изразување на мислење, идеите на Шилачи ги нарече „застрашувачки“ и посочи дека таквите забрани само ќе ги поттикнат луѓето да пушат.
„Тоа е нешто типично за авторитарен и диктаторски комунистички режим“, изјави Сгарби за новинската агенција „АднКронос“.
Главниот италијански здравствен институт објави дека околу 24 отсто од возрасните Италијанци минатата година пушеле, што е околу 12,4 милиони луѓе и е највисок процент регистриран од 2009 година до сега.
Владата во 2003 година донесе забрана за пушење во затворени простории, која стапи на сила две години подоцна.
Здравственото здружение „Фондација Умберто Веронези“ проценува дека најмалку 43.000 луѓе годишно умираат во Италија од причини поврзани со пушењето.
Предложеното ограничување се соочува и со скептицизам од вицепремиерот и лидер на партијата Лига, Матео Салвини, кој се откажа од пушењето пред четири години, но рече дека забраната за е-цигари на отворено е „претерана“.
„Електронските цигари им помагаат на многу луѓе да ги остават обичните цигари“, додаде тој на Твитер.
Предлозите ќе треба да бидат одобрени од владата пред да бидат проследени до парламентот.