Шпанија е првата европска земја која, со новиот закон усвоен вчера, им обезбеди на жените кои страдаат од менструални болки да можат да добијат платено отсуство од работа.
На жените ќе им биде дозволено да останат дома неколку часа во текот на работниот ден или да земат медицинско отсуство доколку болката ги спречува во работата, се наведува во новиот закон, кој дава право на три дена „менструално“ отсуство, со можност за продолжување до пет дена за оние со болни менструации, кои можат да предизвикаат тешки грчеви, мачнина, вртоглавица, па дури и повраќање, објави Еуро њуз.
За отсуството е потребно лекарско уверение, а јавниот систем за социјално осигурување ќе ги покрие сите трошоци за боледување.
„Правилото ќе престане да биде табу“, изјави министерката за еднаквост Ирене Монтеро, која инаку е иницијатор за спроведување на законот.
Со овој потег е реформиран законот од 2010 година, со кој се гарантираат сексуалните и репродуктивните права на жените, а новиот закон усвоен вчера ја утврдува позицијата на Шпанија како една од најнапредните европски земји по прашањето за абортусот и репродуктивните права.
Законот сега дозволува девојчиња на 16 и 17 години да абортираат без согласност од родителите.
Предлог-законот, кој е дел од поширокиот пакет за сексуални и репродуктивни права, вклучува и дозвола за секој кој има 16 и повеќе години слободно да може да го менува полот.
