Брендон Коладо е уапсен поради следење на семејството на Илон Маск.Бил идентификуван, според Вашингтон пост, откако Маск со своите 122 милиони следбеници на Твитер сподели видео од овој настан.Тој напиша дека „луд демнач“ го следел неговиот автомобил затоа што мислел дека тој се наоѓа во него.
Во краткото видео, осомничениот може да се види како носи црна качулка и маска за лице во бело „хјундаи“.
Коладо го запрел телохранител, откако скокнал на хаубата на автомобилот во кој патувал синот на Маск, Икс.
После апсењето, Коладо тврдеше дека всушност Илон Маск го демнел него и го држел под 24-часовен надзор, пишува Дејли мејл.
Маск, кој не бил присутен на инцидентот, објави видео на Твитер во кое прашува дали некој го препознал човекот или автомобилот на снимката.
За инцидентот, на крајот, го обвини профилот на Твитер „@elonjet“, кој го следел неговиот авион 23 часа пред инцидентот.
Инцидентот се случил на бензинска пумпа во Пасадена, на 40 километри од аеродромот.
Во интервју за „Пост Сандеј“, Коладо потврди дека тој е маскираниот маж на видеото и дека го интересира семејството на Маск.
Но, исто така, рече дека мајката на децата на Маск, поп ѕвездата Грејмс, му праќала шифрирани пораки преку објави на Инстаграм.
Грејмс, чие вистинско име е Клер Елиз Баучер, живее во куќа во близина на бензинската пумпа каде се случи инцидентот.
Во разговор со новинарите од „Пост“, Дру Харвел и Тејлор Лоренцо, чии профили се времено отстранети од Твитер, откако побараа коментар од Маск за инцидентот, Коладо призна дека го интересираат Маск и Грејмс.
Двојката се раздели во 2021 година, само една година по раѓањето на синот Икс.
Грејмс неодамна била прогонувана од маж против кого поднела барање за забрана за приближување, а полицијата сега истражува дали се работи за истото лице.
Коладо, исто така, рекол дека верува оти извршниот директор на Твитер, Тесла и Спејс Икс, постојано ја следи неговата локација во реално време и дека милијардерот може да побара од фирмата каде што работи повеќе да не му доставува храна.
Полицијата му влегла во траг на Коладо со помош на снимката која Маск ја објави на Твитер, а „Пост“ утврди дека станува збор за изнајмено возило од сервисот „Тиро“.
Снимките кои Коладо ги сподели со „Пост“ покажуваат како тој излегува од својот автомобил и стои пред „тојота“ која ја управувал телохранител.
Во одреден момент му го попречил патот на возилото и се качил на хаубата.
Набрзо на местото на настанот пристигнала и полицијата која го испрашала.
Полицијата не пронашла докази кои сугерираат дека следењето на Коладо и профилот на Твитер „@elonjet“, зад кој е 20-годишниот студент Џек Свини, се поврзани.
Маск, минатата година, му понуди на Свини 5.000 долари за да го отстрани профилот што тој го сметаше за безбедносен ризик.
Свини ја одби понудата и побара 50 илјади долари и автомобил „тесла“, но договор не е постигнат. Неговиот профил беше суспендиран по инцидентот.
