Поранешниот герилец и косовски претседател, Хашим Тачи, херој меѓу своите сонародници за водењето на бунтот против српската власт во 1998-99 година, што на крајот доведе до независност на Косово, денеска ќе се појави пред меѓународниот суд во Хаг со обвинение за извршени воени злосторства.
Специјалниот суд го обвини Тачи во ноември 2020 година за воени злосторства и злосторства против човештвото, вклучително и прогон, убиства, тортура, присилно исчезнување и други злосторства извршени за време на борбата за независност.
Педесет и четиригодишниот поранешен претседател и некогашен лидер на Ослободителната војска на Косово (ОВК) поднесе оставка од функцијата шеф на државата веднаш по подигнувањето на обвинението и се пријави во хашкиот суд.
Тројца од неговите најблиски соработници, вклучително и двајца поранешни претседатели на парламентот, се соочуваат со истото обвинение, како поранешните герилци на ОВК.
Покрај Тачи, во истото обвинение се вклучени и Кадри Весели, Јакуп Красниќи и Реџеп Селими.
Судењето ќе почне со воведните зборови на обвинителството, после што во следните три дена ќе зборуваат адвокатите на одбраната и претставник на Советот на жртвите од војната на Косово.
Заеднички злосторнички потфат
Сите четворица се обвинети за „заеднички злосторнички потфат во рамки на кој беа извршени масовни, системски напади“ на српските цивили на Косово и косовските Албанци кои беа политички противници на ОВК.
Повеќе илјади луѓе протестираа вчера во Приштина во знак на поддршка на поранешниот претседател и тројцата сообвинети. За нив обвинетите се херои.
Демонстрантите дојдоа од сите делови на Косово во Приштина и носеа транспаренти на кои, меѓу другото, пишуваше: „Правда, а не политика“ или „Нашата историја не може повторно да се пишува“.
„Со нив сме засекогаш“, рече Мемли Красниќи, лидерот на Демократската партија на Косово.
„Воопшто не се сомневаме дека тие ќе се вратат победници, на ист начин како што се вратија како ослободители, затоа што се живи херои“, додаде тој.
Во пресрет на почетокот на судењето низ цело Косово се појавија плакати со фотографии од Тачи и поранешниот претседател на парламентот Весели, на кои пишува „Херои на војната и мирот“.
Но, од друга страна има и такви кои се надеваат дека судењето е последна шанса да дознаат што се случило со нивните најблиски.
Специјалниот суд за Косово е формиран во 2015 година и исклучиво се занимава со случаи против поранешни герилци на ОВК. Седиштето му е во Хаг, а судиите и обвинителите се меѓународни.
Голем број косовски Албанци сметаат дека судот во Хаг е пристрасен.
