Унгарскиот премиер, Виктор Орбан, изјави вчера дека верува оти е дојдено време за „исушување на мочуриштето“ во Европската унија.
На годишната меѓународна прес-конференција во Будимпешта, Орбан рече дека неодамнешниот корупциски скандал во кој се вмешани неколку пратеници на Европскиот парламент го доведе во прашање кредибилитетот на таа институција и дека затоа го поддржува укинувањето на парламентот, онаков каков што е во моментов.
„Унгарците би сакале Европскиот парламент, во сегашниот облик, да се распушти.
Лесно е да се одговори на тоа колку е нарушен угледот на Европскиот парламент во Унгарија: нималку, бидејќи понизок не може да биде“, рече Орбан.
Речиси тричасовната конференција за новинари, која се одржува секоја година, речиси е единствената можност во годината кога меѓународните медиуми и критичките унгарски медиуми можат да му постават прашање на унгарскиот премиер.
Популистичкиот лидер континуирано се судира со Европската унија, која го обвинува за кршење на демократските норми и немање волја да се справи со корупцијата. Меѓутоа, Орбан вчера возврати обвинувајќи го Европскиот парламент за неодамнешниот корупциски скандал во врска со плаќање за услуги, во кој наводно е вмешан Катар.
Орбан позајми фраза од поранешниот американски претседател Доналд Трамп, велејќи дека е време да се „исуши мочуриштето“ во Брисел.
Вчерашната конференција се одржа во моментите кога Унијата замрзна повеќе од 12 милијарди евра наменети за Унгарија поради загриженоста дека владата на Орбан ја загрози независноста на судството, дозволи корупција во службите и ги намали малцинските права.
Во септември, Европскиот парламент објави дека Унгарија повеќе не може да се смета за демократија и дека станала „хибриден режим на изборна автократија“ под водство на Орбан.
Дополнителни тензии меѓу Будимпешта и Брисел предизвика лобирањето на унгарската влада против санкциите против Москва поради војната во Украина.
Орбан, кој се смета за еден од најблиските сојузници на рускиот претседател, Владимир Путин, во ЕУ, тврди дека санкциите биле неефикасни во правењето притисок врз Русија да стави крај на војната и дека нанеле повеќе штета на европските економии отколку на Русија.
„Ние да се прашувавме, немаше да има политика на санкции“, рече унгарскиот премиер, додавајќи дека во иднина нема да поддржува дополнителни пакети санкции против Русија, но и дека нема да застане на патот на ЕУ да ги усвои.
„Не е во наш интерес трајно да ги делиме европската и руската економија на два дела, затоа се обидуваме да го спасиме она што може да се спаси од нашата економска соработка со Русите“, посочи тој.
Орбан се согласи на голем број отстапки за да обезбеди испорака на многу потребните европски фондови, но Европската комисија инсистира на дополнителни реформи доколку Будимпешта сака да добие пристап до парите.
Унгарија се бори со една од највисоките стапки на инфлација во Европа и нестабилна валута што предизвика вртоглаво покачување на цените.
Во ноември стапката на инфлација беше повисока од 22%, а вредноста на форинтата падна за речиси 10% во однос на еврото од почетокот на годината.
Орбан порача дека владата планира да ја намали инфлацијата на едноцифрена до следниот декември.
