Унгарија соопшти дека е подготвена со затворање на барателите на азил во кампови на јужната граница со Србија, откако овој месец беше усвоен закон за тоа кој предизвика критики од организации за заштита на човековите права и Обединетите нации.
Од денес, барателите на азил кои ќе влезат во Унгарија и тие кои моментно се наоѓаат во таа земја ќе бидат затварани во тие кампови додека барањата не им бидат обработени, пренесува АФП.
„Безбедносните службите во целост се подготвени за стапување на сила на засиленото легално затворање на границата од 28 март“, соопшти унгарското Министерство за внатрешни работи.
Полицијата, одбранбените сили и канцеларијата за емиграција и азил спроведоа посебни подготовки за примена на оваа нужна мерка, се наведува во соопштението.
Министерството истакнува дека целта на ваквото решение е „спречување на мигрантите со нејасен статус слободно да се движат по територијата на земјата и Европската унија, за да се намали безбедносниот ризик од миграции.
Премиерот Виктор Орбан соопшти дека 324 контејнери се поставени на две одвоени локации кои се нарекуваат „транзитни зони“, а се изградени крај оградата која Унгарија ја подигна долж границата долга 175 километри во 2015 година.
Унгарскиот парламент усвои на 7 март закон за систематско затворање на сите баратели на азил во кампови на границата, во кои има поставено „прилагодени“ контејнери за превоз на трговски стоки, потсетува француската агенција.
