Транспарент со текст „Работничка, НЕ, Славеничка“ поставен е ноќва врз Градски трговски центар наспроти паркот „Жена-борец“.
„Со транспарентот „Работничка, НЕ, Славеничка“ упатуваме порака до сите граѓани да не го сведуваат овој ден на попусти, подароци и прослави. Лажната еднодневна еуфорија нема да ги подобри работничките права, ниту ќе овозможи редовен и соодветен работен однос за славениците“, велат организаторите на осмомартовската герила акција.
Акцијата, напоменуваат тие, е спроведена со цел да се потсетат жените во Република Македонија дека 8-ми март не е „Светски ден на мајката“ или жената како празна фраза, туку борба за социјална еднаквост и унапредување на работничките права на жените ширум светот“.
„Да ја замениме досегашната практика на подарување со конкретни барања за подобрување на работничките права и еднаквост на жените. Да излегуваме на маршови, а не по трговски центри. Да се избориме за подобра социјална сигурност и заштита од експлоатација на трудот уште денеска!“, велат организаторките.
