Во јуни 2017 година сезонски прилагодената стапка на невработеност во 28-те земји на ЕУ изнесува 7,7 отсто, исто како и претходниот месец, се вели во извештајот на канцеларијата за статистика на ЕУ, објавена во вчера. Првичната проценка за мај се коригира пониско за 0,1 процентен поен, напоменуваат од Евростат.
Така, на ниво на ЕУ таа остана на најниско ниво од декември 2008 година. На годишно ниво пониска е за 0,9 процентни поени.
Во Хрватска во јуни, сезонски прилагодената стапка на невработеност падна на 10,6 отсто, од 10,8 отсто во претходниот месец и од 13,3 отсто во минатогодишниот јуни. Бројот на невработени притоа е намален за околу четири илјади споредбено со мај и за близу 55 илјади во споредба со истиот период минатата година.
Поголемиот пад на стапката на невработеност од Хрватска на годишно ниво бележи само Шпанија, каде што стапката на невработеност падна на 17,1 отсто, од 19,9 отсто во јуни минатата година. Иако значително намалена, стапката на невработеност во Шпанија, четвртата економија по големина во еврозоната, се уште е меѓу највисоките во ЕУ, заедно со Грција, каде што во април изнесуваше 21,7 проценти.
Пад на стапката на невработеност бележат сите земји членки на ЕУ, со исклучок на Естонија, каде што таа, според извештајот на Еуростат, се зголеми на 6,9 отсто во мај 2017 година, од 6,5 отсто во мај лани.
Најниски стапки бележат Чешка, од 2,9 проценти, Германија од 3,8 отсто и Малта, од 4,1 отсто.
Во Еуростат проценуваат дека во јуни во ЕУ се регистрирани 18.725.000 невработени, од кои 14.718.000 во еврозоната.
На месечна основа, нивниот број е намален за 183 илјади во ЕУ и со 148.000 во еврозоната, а на годишна основа невработеноста во ЕУ „падна“ за 2,36 милиони и скоро 1,7 милиони во еврозоната.
Од ова произлегува дека во еврозоната во јуни 2017 година стапката на невработеност се симна на 9,1 отсто, што е најниско ниво од февруари 2009 година, од ревидираните 9,2 отсто во мај. Првичната проценка за мај, како и на ниво на ЕУ, е ревидирана надолу за 0,1 процентен поен, напоменуваат во Еуростат.
На годишно ниво во 19-члената економија стапката на невработеност се намали за еден процентен поен.
Пад на стапката на невработеност меѓу младите
Стапката на невработеност кај младите луѓе на ниво на ЕУ како целина, во јуни изнесуваше 16,7 отсто, а во еврозоната од 18,7 отсто, по стагнација во мај на 16,9 односно 19 проценти. Во јуни 2016 година во ЕУ таа изнесуваше 18,8, а во еврозоната 21 проценти.
Во ЕУ во јуни 2017 година евидентирани се 3.710 милиони невработени лица на возраст помала од 25 години, од кои 2,588 милиони во еврозоната. На годишна основа, нивниот број е намален за 586.000 во ЕУ и за 399.000 во еврозоната.
Највисока стапка на невработеност кај младите е забележан во Грција, од 45,5 отсто во април оваа година. Следат Шпанија, со 39,2 отсто, и Италија, третата по големина економија во еврозоната, со 35,4 отсто, објави Еуростат.
