Папата Фрањо ги осуди вчера лажните вести како „зло“, истакнувајќи дека новинарите и корисниците на социјалните мрежи би требало да се дистанцираат од манипулаторски „подмолни тактики“ и да ги разоткријат затоа што тие сеат поделби кои им служат на политичките и економските интереси.
„Лажните вести се знак за нетолерантни и хиперсензитивни ставови и водат само кон ширење на ароганција и омраза. Тоа е крајниот резултат на невистината“, истакна тој во првиот папски документ за тоа прашање, пренесува Ројтерс.
Овој документ под наслов „Вистината ќе ве ослободи – лажни вести и новинарство за мир“, објавен е после повеќемесечна дебата за тоа колку лажните вести можеби влијаеле на претседателската кампања во САД во 2016 година и на изборот на Доналд Трамп за претседател.
„Ширењето на лажни вести може да служи во корист на одредени цели, да влијае на политички одлуки и да служи на економски интереси“, напиша папата во документот, осудувајќи ја „манипулаторската употреба на социјалните мрежи“ и другите облици на комуникации.
Папата Фрањо укажа дека „во лажните вести лесно може да се поверува, лесно заведуваат затоа што привлекуваат внимание на луѓето повикувајќи се на стереотипи и вообичаени општествени предрасуди и користејќи моментни емоции како што се страв, презир, гнев и исфрустрираност.
Според неговите зборови, лажните приказни се раширија толку брзо што дури ни авторитативните негирања не ретко не можеа да ја ограничат причинетата штета и многу луѓе се најдоа во опасност да станат „несакани соучесници во ширењето на пристрасни и неосновани идеи“.
Врховниот поглавар на Римокатоличката црква повика на „образование поради вистината“ кое ќе им помогне на луѓето да ги проценат и разберат вестите и да го разберат „ништожниот облик на заведување кој го наоѓа патот до срцата со лажни и привлечни аргументи“.
Папата Фрањо го спореди користењето на лажни вести со библиската приказна за ѓаволот кој, преправен во змија, ја убеди Ева да го изеде забранетото овошје, а со тоа, укажува папата, Сатаната на Ева и даде лажна информација.
„Мораме да го разоткриеме она што би можело да се нарече „змијска тактика“ која ја користат оние кои се преправаат за да можат да делуваат во кој било момент и на кое било место“, порача папата.
Улогата на новинарите, истакна тој, „Не е само работа, туку е мисија“ и тие имаат посебна одговорност да ги запрат лажните вести“ при што во време на брзо информирање „мораат да имаат на ум дека сржта на информацијата не е брзина со која таа се пренесува ниту нејзино влијание на аудиториумот, туку – луѓето“.
„Новинарството помалку би требало да се концентрира на итни вести, а повеќе на истражување на основните причини на судирите“, заклучи папата, повикувајќи се на заедничка посветеност на повторно откривање на „новинарското достоинство“ и на „вистинито новинарство наспроти реторичките слогани и сензационалните наслови“.
Папата Фрањо откако дојде на чело на Римокатоличката црква научи да ги користи медиумите за да испрати своја порака, но често се жали на она што го смета за еднострано известување и на „гревови на медиумите – дезинформации и клевети“, наведува АП.
Католичката црква, инаку, на 13 мај, ќе го одбележи Светскиот ден на социјалните коминикации, потсетува Ројтерс.
