Од ЈСП во соопштение велат дека во случајот од 14.02.2019 година во кој патник пријавил дека на линија 19 бил натепан од страна на контролори бидејќи не поседувал билет, контролорите воопшто не примениле сила!
Напротив, патникот давал отпор и физички се обидел да посегне по контролорите, но во меѓувреме, стигнала екипа на МВР и го презела случајот.
Во случајот од 7.02.2019 година во кој патник пријавил дека бил натепан од возач на линија 33, не станува збор за напад, ниту, пак, возачот применил сила! Имало вербална расправија.
Патникот кој го пријавил случајот бил во алкохолизирана состојба и возачот заради безбедноста на другите патници во автобусот, го отстранил, односно го симнал патникот од автобусот, по што тој пријавил наводно тепање од страна на возачот.
Посочените примери се само дел од повеќето за кои јавноста е информирана еднострано.
Како во иднина би се избегнале вакви ситуации со кои се оцрнува ЈСП Скопје, потенцираме дека претпријатието е отворено и достапно за соработка со медиумите за било какви прашања.
За сите инциденти во јавниот превоз информирана е и нашата Внатрешна контрола и сите случаи се регистрирани, така што, медиумите во секое време можат да добијат навремена и комплетна информација за било кој пријавен инцидент.
На ова укажуваме со цел да не се добива погрешна слика во јавноста за ЈСП Скопје, конкретно за возачите и контролорите кои професионално и совесно си ја извршуваат работата.
Напоменуваме дека контролорите и возачите не смеат да употребат физичка сила, исклучок се ситуации кога станува збор за самоодбрана.
Инаку, во изминатиот месец извршена е 31 контрола на пријавени недоразбирања (инциденти) помеѓу контролори и патници, при што е утврдено дека во 11 ситуации биле виновни контролорите и против нив се покренати дисциплински постапки.
Останатите 20 случаи, пак, завршиле со помирување на двете страни, при што патниците признале дека се виновни за предизвикување на инцидентот.
Посочените бројки укажуваат и потврдуваат дека и граѓаните, корисници на јавниот превоз не секогаш се во право.
Во меѓувреме, апелираме патниците уредно да се валидираат при користење на јавниот превоз.
Истовремено, укажуваме дека и понатаму соодветно ќе бидат санкционирани сите злоупотреби на картичките „Скопска“ (зачестено возење на лица со туѓа персонализирана картичка).
Линиската контрола во јануари месец има издадено 1075 казнени билети од кои речиси 50 се заради злоупотреба на „Скопска“.
Се вели во соопштението на ЈСП.
