Кинескиот врховен водач Си Џинпинг нареди спроведување на најголема реорганизација на националната војска од 2015 година, вклучувајќи и голема преобразба на Одделот за сајбер војување.
„Кина на тој начин ќе ги затвори Силите за стратешка поддршка, огранок што беше создаден пред речиси девет години за да ги обедини и полесно да ги координира воените напори во вселената, сајбер просторот и политичкото и електронското војување“, објави државната новинска агенција Ксинхуа.
Наместо тоа, Кси побара создавање на целосно нов оддел во војската под називот Информациски сили за поддршка.
Сите воени оддели кои досега беа задолжени за вселената и за сајбер војна и кои претходно беа под команда на Силите за стратешка поддршка ќе бидат засилени и интегрирани.
Вселенските сили сè уште се во релативно апстрактна позиција, исто како и нивните потенцијални ривали во американската војска, но почетните позиции евидентно веќе се заземаат.
Ова преструктуирање е дел од постојаната борба за примат и глобалното влијание меѓу втората по големина економија во светот и Соединетите Американски Држави.
И додека вселената е сè уште прилично апстрактно поле за борба, сајбер војувањето се појавува како клучно бојно поле, денес и во блиска иднина.
САД, Британија и Нов Зеланд неодамна одново ја обвинија Кина дека спонзорира малициозни и злонамерни хакерски активности насочени кон демократските институции и процеси.
Кси нагласи дека новиот оддел на војската „ќе обезбеди клучна поддршка во координирањето на создавањето и користењето на сајбер просторот и на информацискиот систем“.
Ли Веи, политичкиот комесар кој беше задолжен за сега веќе непостоечките Сили за стратешка поддршка, ќе преземе идентична улога во новосоздадениот сектор во војската. Тој покорно вети дека „одлучно ќе ги слуша и почитува“ упатствата на Кси Џинпинг.
Нов воен командант на Силите за информациска поддршка е Би Ји, објави државната телевизија ССТВ.
Во практична смисла, промените се насочени кон подобро прилагодување на кинеската војска на „информатизацијата“ на модерното боиште, објасни Као Веидонг, пензиониран истражувач од Поморската академија ПЛА, за јапонски „Тајмс“.
„Реструктуирањето на овие воени гранки треба да доведе до подобро и поквалитетно распоредување и насочување на сателитски системи, сајбер капацитети и алатки за електронско војување“, вели Као.
Поранешниот командант на Силите за стратешка поддршка, Џу Кјаншенг, инаку, исчезна од очите на јавноста и никој не знаеше каде се наоѓа.Неговото исчезнување, се шпекулира, е дел од големите потреси што се случуваа во кинеското воено раководство во последната година.И иако Ју неодамна се појави, дали тој повторно ќе има истакната улога во војската и каква би можела таа да биде, не е познато.
Неговото и сличните исчезнувања на други истакнати воени лица, како и оваа појнова реорганизација, се само продолжение на сеопфатната чистка на Кси на воениот естаблишмент.
Американските разузнувачи веруваат дека овие потези во голема мера се направени како одговор на откривањето на ендемската корупција во војската. Ова ги вклучува и Ракетните сили, секторот кој управува со растечкиот кинески нуклеарен арсенал.
Во чистката, без какво било објаснување, во октомври минатата година беше опфатен и министерот за одбрана, Ли Шангфу, а таа позиција во декември ја презеде морнаричкиот ветеран Донг Јун.
(Фото: ЕПН / Њуском)
