Повеќе од 70 родители на ученици од ОУ „Димо Хаџи Димов“ се потпишале на барање до директорката и советот на родители, во кое инсистираат на јасен план за редовен и засилен санитарен надзор, строга контрола врз операторот кој ја подготвува храната во училиштето, протокол за хигиена на просториите и санитарните јазли и конкретни чекори за спречување на сличен инцидент. Ова доаѓа откако дел од децата минатата недела побараа медицинска помош поради тегоби во стомакот, а мострите од спроведената контрола на Институтот за јавно здравје потврдија присуство на фекални бактерии во мусаката и на неколку површини од кујната. Вкупно 6 деца беа позитивни на норовирус.
Родителите бараат и писмена гаранција за безбедност, односно да им се достави официјална изјава по спроведените контроли, потврда дека просториите, кујната и опремата се во целосна согласност со санитарните стандарди и гаранција дека сите ризици по здравјето на децата се елименирани.
Доколку училиштето не ги исполни своите законски должности, го задржуваат правото да ја вклучат општината, МОН, и другите надлежни институции, како и да иницираат постапки доколку наведените информации не бидат обезбедени.
Потсетуваат дека неспроведувањето на законските одредби, претставува сериозен пропуст и повреда на повеќе нормативни акти, за што училиштето сноси управна и материјална одговорност. Не прифаќаат усни ветувања и неофицијални информации.
