Аргентинскиот крајно десен либертаријанец Хавиер Милеи, обожавател на Доналд Трамп, ја шокираше земјата во неделата кога излезе како релативен победник на претседателските предизбори, а сега големото прашање е дали ќе може повторно да го направи тоа на општите избори во октомври, пишува „Ројтерс“.
Предизборите во Аргентина се добар показател за резултатите од самите претседателски избори.
Се разликуваат од оние во другите земји бидејќи не се ограничени само на партиски членови, туку се отворени за секој кој има право да гласа на претседателските избори.
Оној којшто ќе освои најмногу гласови на прелиминарните избори се смета за фаворит на претседателските избори на 22 октомври.
Милеи освои 30 отсто од гласовите, нешто повеќе од главниот конзервативен блок (28 отсто) и владејачките леви перонисти (27 отсто).
Аргентинските медиуми резултатот го опишаа како „политички земјотрес“. Весникот „Ла Насион“ дури го спореди резултатот на Мајли со цунами.
Темпераментниот економист, чии бурни предизборни митинзи се споредуваат со оние на поранешниот американски претседател Доналд Трамп, може да го преврти политичкиот „статус кво“ на глава, во Аргентина.
Вети дека ќе ја укине централната банка, ќе ја доларизира економијата и нагло ќе ги намали државните трошоци.
Министерот за економија, Серџо Маса, кандидат на владејачката перонистичка коалиција, рече дека прелиминарните избори се само „прво полувреме“ од изборниот натпревар.
„Имаме и второ полувреме, па продолженија, а потоа и пенали. Ќе се бориме до последната минута“, изјави тој после објавувањето на резултатите од предизборите на кои перонистите го постигнаа најлошиот резултат на предизборите кога и да е.
Аналитичарите велат дека повеќе луѓе би можеле да излезат на гласање во октомври по излезноста од 69,5 отсто на предизборите.
Конзервативната коалиција „Заедно за промени“ вети дека ќе се обедини зад својата избрана кандидатка Патриша Булрих, тврдокорна поранешна министерка за безбедност, иако таа рече дека резултатите покажале дека луѓето сакаат нешто ново.
„Ова е општество кое бара длабоки промени, се до коренот“, рече таа, ветувајќи безбедност, разумни даноци, крај на годините на неизвесност и бирократизација.
Изборниот натпревар, кој претходно главно беше меѓу двете главни партии, сега ќе има тројца силни кандидати.
Секој од тие тројца кандидати би можел да влезе во вториот круг, наведува Ројтерс.
„Изборната трка сега е поделена на три дела, што порано не беше случај“, рече Алехандро Корбачо, шеф на одделот за политички науки на аргентинскиот универзитет УЦЕМА.
„Јасно е дека постои многу гнев. Луѓето се бесни на политичките класи“, додаде тој.
