Германската полиција покрена истрага против маж на возраст од 40-тина години, откако тој, наводно, фрлил 10-годишно момче од Украина од мост затоа што зборувало на неговиот мајчин јазик.
Инспекторите се сомневаат дека осомничениот е Русин и дека нападот бил политички мотивиран, пишува британски Телеграф.
Од почетокот на руската инвазија, во Германија пристигнаа повеќе од милион украински бегалци кои во последно време се соочуваат со зголемен број напади.
Мажот, за кој се верува дека има околу 40 години и дека зборува руски, се приближил до група деца кои седеле на мостот во градот Ајнбек во Долна Саксонија и зборувале на украински.
Им рекол дека треба да зборуваат на руски и дека Украина е таа што ја започнала војната.
Потоа го повлекол девојчето за коса, а момчето го фрлил преку пет метри високата ограда на мостот во каналот, велат истражителите. Пред да падне во вода, 10-годишникот удрил во железните носачи на мостот.
Напаѓачот потоа земал стаклено шише и го удрил момчето во десното рамо додека се уште било во водата, по што побегнал.
Останатите деца притрчале да му помогнат на повреденото момче и ги повикале родителите.
Во болницата му биле констатирани полесни повреди на левото стапало и главата, но набргу по приемот бил пуштен.
Нападите во Германија ескалираа откако Берлин ја засили воената помош за Киев со потешко оружје и ја отвори вратата за бегалците.
Крајната десница наклонета кон Путин, како и Русите кои живеат во Германија, своето незадоволство го изразија со се почесто непријателско однесување кон Украинците.
Во еден од неодамнешните инциденти, украински студенти во Франкфурт се разбудиле и ја нашле буквата З, симбол на војната на Путин, нацртана на вратата од нивниот дом.
Други Украинци пријавиле дека ги извадиле сите украински симболи од облеката поради страв да не бидат нападнати.
Се проценува дека во Германија живеат 3,5 милиони етнички Руси, што е најголема популација во западниот свет, освен нив има и Руси со германско потекло и руски Евреи.Милиони луѓе имигрирале таму во 90-тите по распадот на Советскиот Сојуз.Иако во повеќето случаи тие се добро интегрирани, за некои се сомнева дека негуваат симпатии кон Кремљ.
„Ова јасно го покажува нивото на омраза кај една од поголемите групи кои живеат во Германија.
Многумина се идентификуваат со Русија и Советскиот Сојуз, гледаат руска телевизија и се целосно испрани од руската пропаганда“, вели Сергеј Сумлени, директор на Европскиот центар за отпор.
Патем, додава дека иако овој напад бил екстремен и неиспровоциран, тој не е исклучок и јасно го покажува нивото на антиукраинизам што владее кај Русите, за подготвеноста да мразат, да нанесуваат болка и да убиваат само затоа што друго лице зборува украински.
(Фото: Ајнбек / илустрација)
