Индија денеска ќе го направи својот втор обид да слета на Месечината, мисија која се смета за клучна за истражувањето на Месечината и статусот на земјата како вселенска сила, само неколку дена откако се сруши сличен руски лендер.
Вселенското летало „Чандрајаан-3“ (Chandrayaan-3) на Индиската организација за вселенски истражувања ќе се обиде да слета на јужниот пол на Месечината околу 18:04 часот по локално време (14:34 часот по средноевропско време), помалку од една недела откако руската мисија Луна-25 не успеа.
Индиската мисија е втор ваков обид. Во 2019 година, Чандрајаан-2 успешно го распореди орбитерот, но неговиот лендер се сруши.
„Слетувањето на месечевиот јужен пол ќе и овозможи на Индија да истражи дали има воден мраз на Месечината. Ова е многу важно за кумулативните податоци и науката за геологијата на Месечината“, рече Карла Филотико, партнер и генерален директор на консултантска фирма „СпејсТек Партнерс“ (SpaceTec Partners).
Молитви за успех на мисијата
Индиската јавност со нетрпение го очекува слетувањето, а медиумите го одбројуваат времето до слетувањето. Се одржаа молитви во храмовите, џамиите и црквите во земјата, а учениците мавтаат со индиската тробојка додека чекаат проекции од слетувањето во живо.
Премиерот Нарендра Моди ќе го набљудува слетувањето од Јужна Африка, каде што присуствува на Самитот на БРИКС, објавија медиумите.
Нерамниот терен го отежнува слетувањето на Јужниот пол, а првото слетување би било историско.
Водениот мраз во областа може да обезбеди гориво, кислород и вода за пиење за идните мисии.
За Индија, успешно слетување на Месечината ќе го означи нејзиниот подем како вселенска сила, бидејќи владата на премиерот Нарендра Моди се обидува да ги поттикне вложувањата во приватни вселенски лансирања и сродни потфати.
