Земјотрес со јачина од 5,1 степени го погоди вчера подрачјето на јужна Калифорнија каде што пристигнува и тропската бура „Хилари“.
Епицентарот на потресот бил во областа северно од Лос Анџелес, а потресите ги почувствувале жителите во голем дел од јужната област на оваа американска сојузна држава, додека се подготвувале за силен дожд и можни поплави кои ги носи „Хилари“.
Земјотресот се случил во 14 часот и 41 минути по локално време, а од тресењето на тлото нема информации за материјална штета или повредени.
Американскиот систем за предупредување извести дека по овој земјотрес нема опасност од цунами.
Тропската бура „Хилари“ вчера предизвика поплави источно и западно од Лос Анџелес, откако со смртоносна сила помина преку мексиканскиот полуостров Долна Калифорнија.
Едно лице во Мексико загина во ненадејните поплави на полуостровот, каде што некои патишта беа однесени.
На фотографиите на социјалните мрежи се гледаат порои кои бликаат низ градските улици кои се претворени во реки.
Гувернерот на Калифорнија, Гевин Њусом, прогласи вонредна состојба во поголемиот дел од јужна Калифорнија, со предупредувања за можни поројни поплави. Наредбата за вонредна состојба е на сила до денес попладне.
Ова е област која беше изложена на долги сушни периоди.
Во планинските и пустинските предели за краток временски период би можеле да наврнат од 12 до 25 см дожд, колку што вообичаено во овие подрачја паѓа на годишно ниво.
Првата тропска бура што го погоди округот Лос Анџелес од 1939 година предизвика сериозни поплави во планините Сан Габриел, источно од градот, и крајбрежните области во северозападниот дел на округот Вентура.
Во округот Сан Бернардино беше наредена евакуација на бројни места во планините и долините, каде што на фотографиите од социјалните мрежи можеа да се видат порои од вода, кал, камења и дрвја.
Во Врајтвуд, на околу 110 километри североисточно од Лос Анџелес, дождот предизвика поголема материјална штета.
Потаму, кон исток, во Оук Глен – еден од петте градови во округот Сан Бернардино во кој е на сила наредба за евакуација – водата фрлаше дрва, кал и камења во воздух.
На запад, во понаселениот округ Вентура, Националната метеоролошка служба предупреди за можни поплави опасни по живот, каде што за само два часа паднаа до 5 сантиметри дожд.
Метеоролошката служба извести за заглавени автомобили, од кои пожарникарите извлекле десетици лица.
Гувернерот Њусом, кој ги обиколува подрачјата во јужна Калифорнија, рече дека пустинската оаза Палм Спрингс (околу 160 километри источно од Лос Анџелес), кога вчера бил таму била „сува како барут“, но еден час подоцна бил информиран за „најобилните врнежи во историјата на Палм Спрингс” кои паднале за само еден час“ па улиците набрзо биле поплавени.
„Многу брзо се се менува. Се е толку непредвидливо. Состојбата се менува за час….“, рече Њусом на прес-конференција во Лос Анџелес, откако изјави дека за се го известил американскиот претседател Џо Бајден, кој им наредил на федералните агенции да преместат персонал и резерви во јужна Калифорнија.
Откажани се стотици летови во Сан Диего, Лас Вегас и Лос Анџелес. Обединетиот училишен округ во Лос Анџелес и обединетата училишна област Сан Диего, двата најголеми училишни окрузи во државата, ги откажаа денешните часови.
(Фото: Робин Бек/АФП)
