Стартуваше со работа леарницата „Краунфилд Фаундри“ во индустриската зона „Неокази“ во Пробиштип.
На пуштањето во употреба на леарницата, во којашто се вработени 58 лица,
присуствуваа премиерот, Зоран Заев, вицепремиерот за економски прашања, Кочо Анѓушев, министерката за странски инвестиции Апостолска, градоначалникот на Општина Пробиштип, Драган Анастасов.
„Кранфилд Фаундри“ е компанија за производство и обработка на одлеаноци од сиво и нодуларно железо која употребува исклучително само електрична енергија. Во процесот на работа строго е забрането употреба на суровини кои содржат штетни материи, за да може да се испорача производ кој ги задоволува сите стандарди за квалитет, безбедност и заштита на животната средина. Од стартот на работите за комплетирање на елаборатите и за изградба на фабриката до денес се
вложени над 17 милиони евра, односно по конечните проценки близу 20 милиони евра“, вели Заев.
Потенцираше дека со ангажирање на локалните градежни компании, оваа странска компанија овозможи и повисок приход на локалните компании, но и во економскиот раст на општината и на регионот.
Вицепремиерот за економски прашања Кочо Анѓушев потенцираше дека отварањето нови фабрики е голем празник, а како што рече тоа само гарантира дека луѓето во регионот ќе имаат иднина, којашто ќе биде одржлива.
„Посебно ме радува што станува збор за инвестиција, која не е трудоинтензивна, којашто не запослува многу луѓе со мали плати, туку вработува високо стручни луѓе со високи плати, а притоа нивото на инвестиција е високо“, вели Анѓушев.
Министерката Апостолска истакна дека денеска нашата држава доби уште една странска инвестиција, а производите коишто ќе се произведуваат во неа ќе ги задоволуваат највиските стандарди за квалитет, безбедност и заштита на животната средина, со користење на напредна и современа технологија, а притоа не се ослободуваат издувни гасови и отпадни води.
Главниот извршен менаџер на Краунфилд Фаундри, Дариус Ѕиуба забележа дека во портфолиото на производи влегуваат производство на капаци за шахти, фазонски делови, воздушни вентили и хидранти, елементи за железници и гасоводи, делови за земјоделски и градежни машини, а во блиска иднина ќе произведува и делови за автомобилската индустрија.
„Оваа церемонија е значаен момент за нашиот бизнис и ние исто така веруваме дека ова е важен чекор за развојот на просперитетот на заедницата на Пробиштип. Денешниот настан е прослава на заедничките напори, кои резултираат во една од најмодерните и најеколошки леарници не само во оваа земја, туку и во Европа“, вели Ѕиуба.
Градоначалникот на Пробиштип, Драган Анастасов најави дека како општина ќе постават мерни станици, кои ќе утврдат дали има или не загадување од оваа леарница.
Тој најави дека во оваа индустриска зона влегува уште една странска инвестиција, станува збор за англиска компанија за производство на марихуана, но и на козметички производи од неа.
