Судскиот совет со кој претседаваше судијката Фанка Јанчулева-Михаиловска во Кривичниот суд во Скопје денеска му изрече осумгодишна казна затвор на поранешниот генерален секретар на Владата, Драги Рашковски, првообвинет во случајот „Софтвери“, заради злоупотреба на службената положба и овластување, перење пари и фалсификување исправа.
Затворски казни добија и другите шестмина обвинети во случајов.
Игор Христов доби пет години и шест месеци, Ивица Димитровски пет години, Даниел Станчев – четири, Ирена Ивановска три години и шест месеци, и Игор Ивановски и Маја Силјановска по три години.
Пресудата не е правосилна и осудените имаат право на жалба до Апелацискиот суд.
Случајот „Софтвери“ се однесува на тендери распишани од Генералниот секретаријат на Владата во времето на Рашковски и опфаќа четири набавки – на систем за биометриска идентификација, софтвер за определување на просечна брзина на возила во сообраќајот и изрекување на казни, АНПР-камери за препознавање на регистарски таблички за возила, набавка на метални кабини за потребите на системот на биометриска идентификација и на систем за автоматско препознавање на регистарски таблички. Дел од обвинението се и исплата на хонорари.
Застапниците на Обвинителството за гонење организиран криминал и корупција во завршните зборови побараа затворска казна за Рашковски и забрана да биде универзитетски професор, но затворски казни и за останатите обвинети.
Рашковски и останатите обвинети, пак, во завршните зборови велеа дека очекуваат ослободителна пресуда затоа што, според нив, Обвинителството не успеало да докаже ниту една од своите теории.
Денешната пресуда доаѓа откако пред нешто повеќе од две години, во март 2021 година, „360 степени“ го отвори случајот во јавноста. Генералниот секретаријат на Владата, информираше „360 степени“ купил софтвер за сообраќајни прекршоци вреден 81.000 евра, иако ниедна институција ниту го барала, ниту го користела, како и дека пред да го купи, како генерален секретар на Владата, тој лично регистрирал таков патент.
Обвинителството за гонење организиран криминал и корупција во април отвори истрага, а потоа, на 8 октомври 2021 година беше поднесено обвинение против Рашковски и шест други лица, а Кривичен на 29 декември истата година во целост во прифати обвинението, по што следуваше судскиот процес кој денеска заврши.
(Фото: „360 степени“)
