Поранешниот министер за внатрешни работи, Митко Чавков рано утрово е приведен по налог на јавен обвинител.
Чавков е приведен поради настаните од 27 април во македонското Собрание кога беа нападнати пратеници од парламентарното мнозинство.
Тој, наводно, не давал наредба полицијата да ги спречи инцидентите на време.
Чавков во моментов е во Кривичниот суд каде дава исказ пред судија на претходна постапка.
Митко Чавков за време на настаниете во април раководеше со оперативниот штаб на МВР. Од пониските структури од МВР тој беше посочен дека два часа не давал наредба за дејствување на полицијата, со што го довел во опасност животот на пратеници и пратеници и новинари.
Во полициската акција утрово заради поврзаност со настаните од 27 април, приведени се и актерот Владо Јовановски, Горан Ангелов – Ќосето од Велес, пратеничката Жаклина Стефановска, пратеникот Крсто Мукоски, поранешниот директор на ФЗОМ Саше Стефановски, пратеникот Љубен Арнаудов и други.
Обвинителството побарало приведување и на Митко Пешев, поранешен началник на одделението за специјални полициски операции и на Душко Лазаров, началник во секторот за Јавен ред и мир.
Триесет и шест лица се гонат за „терористичко загрозување на уставниот поредок и безбедноста“ во врска со настаните кои се случија на 27 април 2017 година во Собранието на Република Македонија, соопшти Јавното обвинителство.
„Основното јавно обвинителство за гонење на организиран криминал и корупција по преземање на сите дејствија за утврдување на фактите во врска со настаните кои се случија на 27 април 2017 година во Собранието на Република Македонија ја заврши предистражната постапка“, информираат од Обвинителството.
Како што е наведено во соопштението од Обвинителството, по разгледување и анализа на прибраниот доказен материјал, Основното јавно обвинителство за гонење на организиран криминал и корупција донесе Наредба за спроведување на истражна постапка против триесет и шест лица поради основано сомнение за сторено кривично дело Терористичко загрозување на уставниот поредок и безбедноста од член 313 од Кривичниот законик.
