Администрацијата на американскиот претседател Џо Бајден вчера се соочи со повици од својата Демократска партија да изврши притисок врз Израел за да ја ублажи хуманитарната криза во Газа, а некои велат и дека ќе се обидат да ја прекинат воената помош доколку не се подобрат условите за живот на цивилите.
„Мораме да ги искористиме сите алатки што го имаме. Администрацијата досега не го искористи сето влијание. Не знам уште колку деца треба да гладуваат пред да ја искористиме целата наша моќ, но навистина мора да направат повеќе “, изјави за новинарите демократскиот сенатор и член на Одборот за меѓународни односи Крис Ван Холен.
Ван Холен и другите пратеници ја повикаа администрацијата да ја запре воената помош за Израел доколку владата на премиерот Бенјамин Нетанјаху не преземе чекори како што се пропуштање на хуманитарна помош за Газа.
Белата куќа не одговори веднаш на барањето за коментар.Администрацијата досега одбиваше да постави услови за помошта што ја испраќа до Израел.
„Уште колку домови и продавници, училишта и детски градинки и болници треба да се уништат пред да му кажеме на Нетанјаху дека е доста?“, рече демократскиот сенатор Пит Велч во говорот во Сенатот.
Членовите на Демократската партија ги упатија повиците до администрацијата во време кога Бајден се подготвува да одржи говор за состојбата на нацијата во Конгресот во кој ќе ги претстави своите политички приоритети.
Израелската офанзива во Газа расели повеќе од 2,3 милиони жители на енклавата и доведе до критичен недостиг на храна, вода и лекови.
Некои гласачи, а особено муслиманите, реагираа на прелиминарните избори, на кои Бајден се бори за номинација на неговата партија за претседателските избори во ноември, со означување на гласачките ливчиња како „неопределени“.
Ван Холен истакна дека американските закони не дозволуваат продажба на оружје на земјите кои блокираат хуманитарна помош и предупреди дека тој и другите пратеници може да се обидат да ја запрат продажбата на оружје на Израел доколку владата во Тел Авив не се посвети на решавање на кризата.
(Фото: Брендан Смиаловски / АФП)
