Францускиот фудбалски прволигаш ПСЖ во петокот продаде 10.000 дресови со името на своето ново засилување и најскапиот фудбалер на светот, бразилската ѕвезда Нејмар.
Дрес со името на Нејмар Јуниор на грбот и со бројот десет чини 100 евра, и со 10.000 продадени примероци ПСЖ само вчера заработи еден милион евра.
Ако ПСЖ секој ден продава по 10.000 дресови со името на бразилскиот фудбалер, тогаш 222 милиони евра колку што и се платени на Барселона за неговото доаѓање, ќе ги врати до средината на март со оглед дека приходите од продажба ги дели со производителот на спортска опрема Најк.
Дрес со името на Нејмар вчера се продаваше во две продавници во Париз, една на Елисејските полиња и една кај стадионот Парк на принцовите, така што продавачите одлучиле за денес да се воведе правило дека едно лице може да купи само еден дрес.
Нејмар на навивачите на ПСЖ им се претстави денес во 13.45 часот, пред првиот натпревар од новата сезона во шампионатот, против Амиен.