Вчера неколку часа пред настапот на американскиот претседател Џо Бајден во Солт Лејк Сити, еден маж е убиен во престрелка во која учествувале агенти на ФБИ во Прово, во американската сојузна држава Јута, пишува „Телеграф“.
ФБИ не го именуваше убиениот, но судските документи покажуваат дека човекот од Прово се соочувал со обвиненија за закани за ликвидација упатени кон претседателот Бајден и Алвин Л. Брег, окружен обвинител на Менхетен.
ФБИ објави дека истражува „пукање во кое е вклучен агент“, а што се случило околу 6.15 часот во Прово, додека специјалните агенти се обидувале да издадат налог за апсење и да претресат дом.
Официјален претставник на Белата куќа рече дека Бајден бил информиран во средата.
Судските документи покажуваат дека човекот од Прово се соочувал со една точка од обвинението за упатување закани, една точка за закани кон претседателот и една точка за влијание, попречување и закана за одмазда против федерални службеници за спроведување на законот, според тужба за кривично дело поднесена во вторникот во Окружниот суд во Солт Лејк Сити.
Во објавите на тој човек на социјалните мрежи се наведува дека имал намера да ги убие претседателот Бајден и обвинителот Брег, кој го води кривичното гонење на поранешниот американски претседател Доналд Трамп во Њујорк, се наведува во тужбата во која имало „скриншотови“ од објавите на оваа личност.
Во објава на Фејсбук од 19 септември 2022 година, човекот напиша дека е „вистинското време за едно или две претседателски убиства“.
„Прво Џо потоа Камала“, напиша тој, мислејќи на претседателот Бајден и потпретседателката Камала Харис.
Во друга објава на интернет, зборувајќи за Брег, човекот напиша дека „сака да застане над Брег и да му направи убава дупка на челото со својот пиштол и да гледа како се грчи додека капки крв течат од дупката додека неговиот живот оди во пеколот!“, пишува „Телеграф“.
(Фото: АФП)
