Судот, по барање на МВР, согласно законските надлежности, распиша меѓународна потерница за Горан Грујовски и Никола Бошковски, обвинети во случаите „Таргет“ и „Тврдина“.
МВР денеска информира дека потерницата е распишата со оглед на тоа дека двајцата обвинети не биле пронајдени на адресите кои се пријавени како места на живеење, како и на повеќе локации во Македонија, за кои имало оперативни сознанија дека осомничените ги користат за криење.
„Вчера, во 21 часот, Апелацискиот суд во Скопје до Министерството за внатрешни работи достави наредба за спроведување на Г.Г и Н.Б. во Истражниот затвор во Скопје. Иако телефонски Судот во 17:00 часот го извести МВР дека ќе бидат испратени наредбите, тоа се случило дури во 21 часот, кога МВР можеше да постапи согласно своите законски овластувања. Веднаш беше распишана национала потерница со која се спроведоа активности за приведување на осомничените. Тимовите на Министерството извршија проверка на објектите на адресите кои се пријавени како места на живеење на осомничените и проверки на повеќе локации на територијата на Република Макдонија, поточно во Скопје, Велес и Охрид, за кои имаше оперативни сознанија дека осомничените ги користат за криење. Со оглед на тоа дека не беа пронајдени, согласно законските надлежности, побара од Судот согласност за распишување на меѓународна потерница за Г.Г. и Н.Б“, се наведува во соопштението од МВР.
