Групата дваесетте најразвиени и економии во развој Г-20 оваа и следната година ќе постигнат раст на активностите нешто над три отсто, објави агенцијата Модис (Moody’s), потврдувајќи ја така својата поранешна прогноза, но предупредува на геополитичките ризици, американскиот протекционизам и можните последици на заострување на монетарната политика.
Поради неочекувано силните податоци за првата половина од годината, таа рејтинг агенција ја зголеми прогнозата на кинескиот економски раст во оваа година, од 6,6 на 6,8 отсто. Подигнати се и проценките на јужнокорејскиот раст, од 2,5 на 2,8 отсто и на јапонскиот од 1,1 на 1,5 отсто.
Во Модис, исто така, очекуваат дека активностите во еврозоната во преостанатиот дел од годината ќе се забрзаат, повикувајќи се на силни показатели на расположението. Агенцијата ги зголеми проценките за Германија, Франција и Италија.
Овогодишната прогноза за САД, пак, е намалена од 2,4 на 2,2 отсто, а таа за идната година од 2,5 на 2,3 отсто, со аргумент за неочекувано слаб резултат во првата половина на годината и поскромен пресметковен буџет отколку што се очекуваше.
„Ситуацијата со ризиците е поповолна отколку што беше на почетокот на годината“, констатираат во Модис.
„Предупредуваме сепак на ризици од непредвидени случувања поврзани за судири на Корејскиот полуостров, Јужното кинеско море и Блискиот исток. Пробното испалување на проектили во Северна Кореја, заострување на агресивната реторика на двете страни и тврдиот став на кабинетот на Трамп го зајакнаа ризикот од судири на Корејскиот полуостров“, додаваат.
Укажуваат и на обновениот замав за настојувањата да се решат билатералните трговски прашања кои кабинетот на Доналд Трамп ги окарактеризира како неправедна трговска пракса. Евентуалното воведување на опсежни мерки би можело да му наштети на растот, предупредуваат од Модис.
Што се однесува до пазарите, укажуваат на ризици од засилени осцилации поради зголемените цени на недвижност во однос на долгорочниот просек и општите очекувања на инвеститорите дека каматните стапки ќе останат ниски и покрај пораките од Американската централна банка и Европската централна банка дека се подготвуваат за постепено укинување на неконвенционалните монетарни поттикнувања.
Во Модис оценуваат дека кинеската економија се повеќе се потпира на ново задолжување поради поттикнување на растот. Во мај, агенцијата го намали кредитниот рејтинг на Кина на А1, предвидувајќи слабеење на финансиската сила на економијата во следните години.
Благо ја намалија прогнозата и на индискиот економски раст, на 7,1 отсто, потсетувајќи дека минатогодишното повлекување од оптек на банкнотите од 500 и 1000 рупии посебно тешко ги погоди индустриските и градежните компании, и тоа во период од повеќе месеци. Сепак, очекуваат дека следните месеци влијанието на тој потег ќе ослаби.
