Новинарката на порталот „Политико“, Ева Хартог, е протерана од Москва, иако во последните десет години известува од Русија, пренесува тој портал и додава дека таа безбедно ја напуштила таа земја.
Руското Министерство за надворешни работи ја известило во понеделникот Хартог, данска државјанка која има руски корени, дека нема да и биде продолжена визата и дека има шест дена да ја напушти земјата.
Хартог рече дека не добила дополнителни информации зошто властите донеле таква одлука.
Од почетокот на руската инвазија на Украина во февруари минатата година, од странските новинари се бара на секои три месеци да аплицираат за визи и медиумски акредитации, наместо тоа да го прават на една година како што беше случај претходно.
Ова е прв случај, откако изби војната во Украина, новинар да биде протеран од Русија, додека дописникот на „Волстрит журнал“, Хуан Гершковиќ, е во затвор од март годинава под обвинение за шпионажа.
Главниот и одговорен уредник на европското издание на порталот „Политико“, Џамил Андерлини, потврди дека Хартог безбедно ја напуштила Москва откако руските власти одбиле да и ја обноват визата и прес акредитацијата.
„Многу сме разочарани од овој потег, но тоа не ја намалува посветеноста на ‘Политико’ да известува за владата на Русија и нејзината војна во Украина.
Се надеваме дека Ева и ‘Политико’ многу брзо ќе се вратат во Москва за да продолжиме со фактичко и непристрасно известување за руската политика“, истакна Андерлини.
Тој повтори дека Ева Хартог е безбедна, но дека Гершковиќ останува неправедно затворен поради неговото фер и точно известување и дека треба тој итно да биде ослободен.
