Запрен е сообраќајот на Кримски мост, кој ги поврзува полуостровот Крим и руската област Краснодар, поради „вонредна ситуација“, објави денеска на Телеграм прорускиот гувернер Сергеј Аксјонов.
Тој, исто така, ги повика жителите да не го преминуваат мостот.
Не наведувајќи деталу, Аксјонов напиша дека „вонредната ситуација“ се случила на 145-от столб од мостот.
Во прекин е и железничкиот сообраќај преку мостот на Крим, но Аксјонов вели дека тој сепак ќе продолжи.
„Наскоро властите ќе дадат повеќе информации за причините за инцидентот“, истакна тој во објавата.
Во неа се додава и дека Аксјонов разговарал со првиот заменик министер за транспорт на Русија, Андреј Александрович Костјук.
Руското Министерство за транспорт потврди дека има оштетувања на патот на кримската страна на мостот, пренесува ТАСС.
Од таму не ги потврдуваат извештаите за тоа дека потпорните столбови се оштетени.
„Министерството соопшти дека во тек е проверка на мостот“, пренесува ТАСС на својот канал на Телеграм.
Украинската новинска агенција РБЦ јави дека на мостот се слушнале експлозии.
Во близина на мостот се прават големи гужви.
Рускиот канал „Сива зона“ на Телеграм, кој е поврзан со групата „Вагнер“, објави дека мостот бил нападнат двапати после 3.00 часот по локално време.
Објавени се и снимки на кои се гледа како чад се издига над мостот.
На социјалните мрежи јавуваат дека во експлозиите загинале две лица, а едно дете е повредено.
„Брачен пар кој патувал со автомобил го загубил животот, а нивната ќерка е повредена, во инцидентот што утринава се случи на мостот на Крим“, соопшти гувернерот на руската област Белгород, Вјачеслав Гладков.
Семејството, наведе Гладков во неговата изјава, е од округот Новосколски во Белгород, кој граничи со украинската регија Харков, и им нареди на локалните власти да ги известат нивните роднини.
„Животот на девојчето не е во опасност и тоа е ставена под лекарски надзор“, рече тој.
„Девојчето е повредено, но не многу тешко… Најтешко е што и починаа родителите, тато и мама“, објави „Гардијан“.
Како што пишуваат руските медиуми, патувале на годишен одмор на брегот на Црното Море.Убиени се Алексеј и Наталија, а нивната ќерка Ангелина е ранета.На социјалните мрежи е објавено видео од нивниот распарчен автомобил.
Тие пишуваат дека Анџелина се здобила со повреди на главата и градниот кош, но нејзиниот живот не е во опасност. Решиле да патуваат ноќе за да ги избегнат гужвите.
Украина се уште не коментира ништо во врска со случувањето на Кримски мост.
Русија го анектира Крим во 2014 година. Мостот долг 19 километри беше оштетен во експлозија во октомври минатата година, во нападот за кој Москва рече дека го извршиле украинските безбедносни сили. Украина неколку месеци подоцна индиректно ја призна одговорноста.
Зад нападот на мостот на Крим стои Киев
Кремљ излезе со соопштение во врска со денешниот инцидент на Кримски мост.
„Денешниот напад на Кримски мост се случи во режија на властите во Киев. Овој режим е терористички и ги има сите карактеристики на меѓународна организирана криминална група. Одлуките ги носат украинските функционери и војската со директно учество на американски и британски разузнавачки агенции и политичари. Америка и Британија се на чело на терористичката државна структура“, изјави Марија Захарова, портпаролка на руското Министерство за надворешни работи.
