Велика Британија е подготвена да плати до 40 милијарди евра, како дел од договорот за напуштање на ЕУ, објави весникот Сандеј Телеграф повикувајќи се на три неименувани извори запознаени со британската преговарачка стратегија.
Европската унија изнесе бројка од 60 милиони евра и сака значителен напредок по прашањето за решавањето на британските обврски пред почетокот на преговорите за комплексните прашања, како што е идниот трговски договор.
Министерството задолжено за преговорите за Брегзит одби да даде коментар на статијата во Сандеј Телеграф. Британија досега нема дадено официјален показател за тоа колку е подготвена да плати.
Весникот објави дека британските власти најверојатно ќе понудат 10 милијарди евра годишно за три години по напуштањето на ЕУ, во март 2019 година, а после тоа да се финализира вкупниот износ со истовремени трговски преговори.
До исплатата ќе дојде само во рамки на договорот кој ќе вклучува трговски договор, додава весникот.
„Ние знаеме дека ставот на ЕУ е 60 милијарди евра, но долната граница е 50 милијарди евра. Нашиот став е излезот да чини 30 милијарди евра, но би се согласиле и на 40 милијарди евра, дури и ако јавноста и политичарите сеуште не се сите согласни со тоа“, пренесува весникот изјава на „висок извор од Вајтхол“.
Вајтхол е дел на Лондон, каде е седиштето на британските државни службеници и министри.
Друг извор од Вајтхол изјавил дека Велика Британија е подготвена на „30 до 40 милијарди евра“, а трет посочува дека премиерката Тереза Меј е подготвена да плати „повеќе од 30 милијарди евра“, пишува весникот.
