„Недозволиво, безобразно и несовесно е на овие поларни временски услови и екстремно ниски температури, припадниците на АРМ да работат во искинати и распаднати униформи, да носат дотраена опрема и да се затоплуваат на ќумбиња како во 19-ти век “, изјави претседателот на Комисијата за одбрана на СДСМ, Максим Димитриевски.
Величковски обвини дека досегашната власт во заминување не ги решава проблемите, ниту пак за тоа се грижат министерот за одбрана, Зоран Јолевски и началникот на ГШ, генерал потполковникот Методија Величковски, кои како што спомена повеќе денови се на службени патувања надвор од државава, а и кога се тука си ја префрлувале одговорноста еден на друг.
„Војниците 10 години се оставени да работат во несоодветни, понижувачки услови, иако ја извршуваат најодговорната задача во државата, заштитата на територијалниот интегритет на Република Македонија. Со истите униформи и обувки им помагаа на граѓаните во поплавите, а со истите помагаат и денеска во овој снег. И со голи раце, наместо со соодветна механизација“, напомена Димитриевски.
Сето ова, вели тој, било резултат на неодговорната криминална власт којашто ја оддалечи АРМ од стандардите на НАТО, како што ја оддалечи и Република Македонија од членството во НАТО.
„Итно е потребна нова, одговорна Влада на граѓаните на Република Македонија, којашто ќе води реално остварливи политики и којашто ќе обезбеди и на припадниците на Армијата и на сите луѓе во државата евро-атлантски перспективи“, заклучи Димитриевски.
На обвинувањата на претседателот на Комисијата за одбрана на СДСМ, Максим Димитриевски, остро реагираше Министерството за одбрана.
„Како и многупати досега така и денес имавме можност повторно да слушнеме колку една политичка партија нема сенс за темата, Одбрана. Министерството за одбрана континуирано работи на подобрување и унапредување на стандардите и условите на работа на припадниците на АРМ согласно законските правила и процедури за набавка се со цел подобра безбедност на нашата држава, а со тоа и зачувување на стабилноста во регионот“, се наведува меѓу другото во писмената реакција од МО.
